Zanin dar 8:00-ah Tuikual South vs Vikings

Mizorama basketball inelna lian ber Mizoram Super League season hnih naah champion lai Khatla TBL, Tuikual South leh Mission Veng Vikings-te'n match hnih an khelh tawh aṭangin hneh loh an la tawng lo.

Zanin dar 8:00 hian Hawla Indoor Stadium, Republic Vengthlangah Tuikual South leh Mission Veng Vikings-te an inhmachawn dawn a, fans nei ṭha pahnih an nih avangin thawm a ring dawn tih a chiang.

Tuikual South hian an match hnuhnung zawkah power forward Vanchuangpuia point 18 score hmangin Chaltlang Ryders chu 66-62 in an hneh a, Vikings pawhin MSL1 runners up Zarkawt BCA chu 84-76 in an hneh ve bawk. Season hmasa khan team pahnihte hi vawi hnih lo inhmachhawn tawhin vawi khat ve ve hnehna an chang a, zanin hian chak zawk nih an duhna a lian hle ang.

Tun season-ah MSL team parukte league round-ah vawi khat ṭheuh an inkhel kual dawn a, a sang paliin semifinal khelin a hniam pahnihin relegation playoff an khel ang. Zanina hnehna changtu zawk hi chu semifinal khel turin an dinhmun a ṭha tawh hle dawn a ni.

State Sports Council coach, tuna Tuikual South team enkawltu KC Lalliantluanga chuan, "MSL1 ai kha chuan tun season-ah chuan kan inbuatsaihna a ṭha tawh zawkin kan zir leh duh angin kan khel chho ṭha ṭan tawh a, Vikings hi team ṭha ni mah se hnehna chan ngei pawh kan beisei," tiin Vanglaini palai a hrilh.