Asia Cup nomawi chawitu India

India chuan Asia Cup chan-china a vawi ruk nan Pathianni zan khan Bangladesh hnehin champion nomawi an chawi a, vawi nga champion tawh Sri Lanka tlanpelin Asia Cup-a champion ngun ber an ni ta.

Shere Bangla National Sta-dium, Dhaka-a inkhelah ruah surin inkhel a tihbuai avangin over 20 khelh turah over 15 khelh a ni a, mualneitu Bangladesh an bat hmasa zawk.

Bangladesh batsman-te'n over 15-ah run 120 an siam a, mi panga an hloh. Bangladeshi batsman zingah Mahmudullah a che ṭha ber a, ball 13-a hma-chhawnah run 33 vaw chhuakin a tawp thleng a dam.

Mualneitu team tan Sabbir Rahman chuan ball 29-a hma-chhawnah run 32 a vaw chhuak bawk a, batsman pahnih hi an ṭhianten an puih ṭhat tawk loh avangin run 120 an tlin hram.

Indian bowler zingah che ṭha fal an awm lo a, Ravichandran Ashwin, Ashish Nehra, Jasprit Bumrah leh Ravindra Jadeja-te'n over thum ṭheuh vawmin wicket khat ṭheuh an la a, Hardik Pandya chuan over thum a vawmah wicket lak a nei lo thung.

India bat hun a thleng a, run khat lek a siam hman tihin tun hnaia che ṭha ṭhin tak Rohit Sharma out nghal mah se a hnua batsman rawn lut pathum Shikhar Dhawan, Virat Kohli leh MS Dhoni-te'n Bangladeshi bowler-te an sawisa a, India an chak chiang hle.

Shikhar Dhawan-a'n ball 44 a hmachhawnah run 60 a siam a, kum 30-a upa batsman che vel hi a hmuhnawm hle. Dhawan out hnuah amah ang thoa che ṭha Virat Kohli a ding tlat a, Delhi batsman hian ball 28 a hmachhawnah run 41 siamin a tawp thleng a dam. India tan captain MS Dhoni a che ropui bawk a, ball ruk lek a hmachhawnah run 20 siamin a tawp thleng a dam a ni.

India-in over 13.5-ah an target an umpha der a, run 122 siama mi pahnih chiah hlohin inelna thlengtu Bangladesh-in tih theih an nei lo.

March 8 aṭangin ICC World Twenty20 khelh lehnghal a ni dawn a, champion turin India chu beisei kai ber a ni ta. Asia Cup nomawi an chawi hmain India hian Twenty20 series-ah Australia leh Sri Lanka awlsam takin an lo hneh tawh a, Asia Cup nomawi chawi turin hneh loh an nei miah lo bawk.

Vawiina India rama khelh ṭan tur ICC World Twenty20 match hmasa berah hian Hong Kong leh Zimbabwe an inhmachhawn ang a, tlai dar 3:00-ah Vidarbha Cricket Association Ground, Nagpur-ah an inhmachhawn ang.

Khelmual ngaiah vek zanin dar 7:30 hian Scotland leh Afghanistan an inhmachhawn dawn bawk a, India hian an match hmasa ber chu March 15 khian Vidarbha Cricket Association Stadium, Nagpur-ah New Zealand nen an khel thung dawn a ni.