Liverpool lak tum Werner-a'n hattrick a siam

Europe league lian zingah Bundesliga chiah en tur la awm mah se player langsar an chet ṭhat avangin inelna a ngaihnawm chho hle. Pathianni zanah RB Leipzig-in Mainz 5-0 in an sawp a, Timo Werner-a'n hattrick a siam.

Germany international Werner hi Premier League hmahruaitu Liverpool nen sawi zawm a ni a, Reds ṭantute tan chuan chanchin hriat nuam a ni ang. Inkhel dangah Augsburg-in khualmualah Schalke 3-0 in an sawp a, FC Cologne leh Fortuna Dusseldorf te 2-2  in an inhnehtawk.

Julian Nagelsmann hnuaiah RB Leipzig-in champion beiseina hial an nei a, hun pawimawhah point an hloh. Coronavirus vanga inkhelh an chawlh hnua an match hmasa berah SC Freiburg nen an inhnehtawk. 

RB Leipzig hian point hnih hlu tak an hloh avangin hmahruaitu Bayern Munich nen an inkar a hla sawt a, an buaina belhchhah turin an star striker Werner-a'n inelna hrang hrangah match li chhung goal a khung tawh lo.

Mainz nen erawh Leipzig-in hmahruai turin hun rei an mamawh lo a, minute 11-na lekah Werner hmangin hma an hruai a, Germany international sriker-in inrintawkna a nei let. Minute 23-naah Yussuf Poulsen-a'n goal hnihna a tauh lut a, Marcel Sabitzer  siamsak a ni.

Leipzig captain Poulsen hian minute 36-naah Sabitzer-a goal khung tur a siamsak ve thung a, Austrian midfielder hian cool takin a khung. First half-ah Leipzig-in goal thum an khung a, chak tur a chiang tawh.

Second half-ah Werner-a'n Europe club lian hoin an it chhan a rawn pholang a, minute 48-naah goal hnihna a khung. Leipzig striker hi a awmna tur takah lo awmin goal ropui tih tur ni lo mah se striker ṭha goal khung danin harsatna nei loin a ball hmuh chu vawi khatah a pet goal nghal.

Minute 75-naah Werner-a'n hattrick a siam a, captain Poulsen-a ball vawrh luh chu Leipzig striker hian um lutin keeper a pet khum. RB Leipzig-in 5-0 in hnehna an chang a, nikum November thla khan Mainz hi 8-0 in an sawp tawh a, hemi ṭum hian Werner-a'n hattrick a siam bawk.

German striker kum 24 mi hian tun season-ah goal 24 a khung tawh a, vawi thum hattrick siam tawhin goal khung tam lamah goal 27 khung tawhtu Robert Lewandowski chiah a tluk lo. Werner tan goal 24 hi Bundesliga-a a khung tam ber ṭum a ni a, 2016–17 season-a goal 21 a khung chu a khum chiah a ni.

RB Leipzig tan champion a harsa dawn a, chutihrualin season thara Champions League khel turin dinhmun an siamṭha chho zel. Germany chanchinbu Bild-in a tarlan danin Werner-a buyout clause hi euro maktaduai 55 a ni a, Champions League an khel thei a nih chuan euro maktaduai 60-ah a pung chho dawn.

Werner chuan, "Jurgen Klopp hi khawvela coach ṭha ber a ni a, tun dinhmunah chuan khawvela team ṭha ber an ni. Thurawn min petu tam takin Liverpool leh ka khelh dan hi an inrem thu min hrilh," tiin a lo sawi tawh a, Anfield pan a hreh lo.