UEFA Team of the Year an puang Kante hnawlin Ronaldo an dah lut?

Europe-a football thuneitu sang ber UEFA chuan 'Team of the Year' an puang a, UEFA website kaltlanga fan-ten an thlanah hian Liverpool chuan player thawh hnem berin player panga ngawt an thawh.

 

Liverpool hian Alisson, Trent Alexander-Arnold, Andrew Robertson, Virgil van Dijk leh Sadio Mane an thawh a, Mohamed Salah hming a lang phak lo thung. Liverpool player zingah VVD tih loh zawng hi UEFA Team of the Year-a an vawi khat lanna a ni. 

UEFA hian November 26 khan player 50 hming chhawp chhuakin vote thlak theih hun a hawng ṭan a, January 9 thleng khan vote hi thlak a ni. Mi maktaduai hnih vel zetin online kaltlangin an player duhzawng an thlang. 

Ṭum dang ang thoin Lionel Messi leh Cristiano Ronaldo an lang a, Ronaldo lang erawhin sawisel a hlawh hle. Khawthlang media-te chuan UEFA chuan N'Golo Kante la chhuakin, a hmun ruakah Ronaldo hi an dah niin a sawi. 

Forward-ah hian Lionel Messi, Sadio Mane leh Robert Lewandowski chu vote hmu sang an ni a, UEFA kalphung pangngai ang chuan 4-3-3 formation hmangin a dik sa thlap. 

Mahse, UEFA-in Ronaldo tel tir hram an duh a, 4-2-4 in formation an thlak a, a tira midfield zinga awm ve Kante aiah Ronaldo dah lutin Portuguese forward hi tlarhmah Lewandowski nen dah dun an ni.  UEFA Team of the Year hi dan ang chuan kar hmasa lama puan tawh tur kha a ni a, mahse player thlak danglam avang hian a puan hun thlengin an ti khawtlai niin khawthlang media-te chuan an tarlang. 

Tun hnai kum ruk chhungin 2017-a 4-4-2 formation a hmang tih lohah chuan UEFA hian 4-3-3 hmang hlirin Team of the Year hi a thlang ṭhin a, kuminah Ronaldo dah tel duh vangin 4-2-4 an hmang. 

UEFA thil tih dan hrechiang tak nia sawi, a hming tarlan loh chuan, "Thil ṭha lo tak a ni. Ronaldo hi a lar em avangin organisation hotu ṭhenkhat chuan a hming lang lo hi an hrethiam lo a, hei hi vote tih chingpenna lian tak a ni," a ti. 

Hetihlai hian UEFA an ngawi mai mai bik lo a, dan ang thlapa engkim kalpui a nih thu an thupuangtu chuan a sawi - chutihrualin Kante la chhuaka Ronaldo dah luta puh an nihna erawh a pha lo thung.

UEFA thupuangtu chuan, "Kumina UEFA Team of the Year hi fans vote hmang chiaha thlan a ni lo a, UEFA hnuai inelnaa an chet ṭhat dan pawh kan thlir tel a ni," tiin vote chauh an thlir loh thu a sawi daih! Ronaldo hian Portugal tan UEFA Nations League nomawi a chawi a, UEFA thupuangtu chuan, "Fans vote leh UEFA hnuaia inelna kan enkawp avangin Champions League nomawi chawitu player pali leh Nations League final khel pali an lan phah a ni. Formation hi chu a ṭul angin kan thlak mai ṭhin," a ti a, a sawifiahna hi tam takin an pawm lo ang. 

UEFA Team of the Year

Goalkeeper

Alisson Becker (Liverpool)

Reds tan ban rinawm niin Champions League nomawi a chawi a, Premier League-ah clean sheet 21 neiin goalkeeper tana mimal chawimawina dawn theih ang chu a hui kim. 

Defenders

Trent Alexander-Arnold (Liverpool)

Season zawna Champions League final-a bul ṭan thei player naupang ber record a siam a, defender zinga season khata Premier League assist (12) ngah ber record a siam bawk. 

Matthijs de Ligt (Ajax/Juventus)

Ajax chu domestic double champion nihpuiin Champions League semifinal a hruai thleng - kum 19 mi lek nichungin captain a ni tih hriat tel a ṭha. 

Virgil van Dijk (Liverpool)

UEFA Men's Player of the Year a ni a, Champions League Defender of the Season-ah thlan a ni a, final-ah man of the match-a ni bawk. Best FIFA Men's Player leh Ballon d'Or-ah pahnihna ve ve a ni a, lan a phu. 

Andy Robertson (Liverpool)

Arnold nena an khel dun chu khawvela full back hmuhnawm ber pawlah chhal an ni a, season hmasa khan Reds tan inelna hrang hrangah assist vawi 13 an nei. 

Midfielders

Frenkie de Jong (Ajax/Barcelona)

Champions League Midfielder of the Season-ah thlan a ni a, Eredivisie Player of the Season a nih bawk avangin a theihna sang tak hi hai der theih a ni lo. 

Kevin De Bruyne (Manchester City)

Premier League ngaina zingah KDB thiam ti lo an awm lo ang. Manchester City chu domestic treble champion a nihpui a, UEFA Euro 2020 khel tura tling hmasa ber Belgium tan tha a thawhhlawk hle. 

Forwards

Lionel Messi (Barcelona)

Champions League Forward of the Season nilai hian CL-ah goal 12 khungin top scorer a ni a, Champions League-a a zawna season 15 goal khung thei hmasa ber a ni. 

Cristiano Ronaldo (Juventus)

Kum 34 ni tawh mah se a thiamna a la ngai reng a, Juve tan Serie A nomawi a chawi a, Portugal tan Nations League nomawi a chawi bawk. UEFA Team of the Year-a vawi 14-a lanna a ni a, lang ngun ber record a chelh mek. 

Robert Lewandowski (Bayern)

Striker langsar tak niin Lewy tan tun hi UEFA Team of the Year-a a vawi khat lanna a ni. Bayern tan Bundesliga leh German Cup nomawi a chawi a, tun season Champions League group stage-ah goal 10 a khung tling der tawh. 

Sadio Mane (Liverpool)

African player of the Year-a thlan hlim Mane hi Champions League Squad of the Season-ah pawh a tel a, season hmasa khan Liverpool tan inelna hrang hrangah match 50 khelin goal 26 a khung.