Nomawi kan beisei ngam tur a ni - Ibra

Zlatan Ibrahimovic-a'n team training a zawm leh thei tawh a, AC Milan striker hian a ṭhiante chu tawnhriat la ngah lo mah se zam lo tura chahin - Serie A nomawi ngaihtuah ngam turin a fuih.

Swede striker palian hian coronavirus a kai a, league match hnuhnung pathumah a inlan thei lo. Tunah chuan hri lakah fihlim tawhin a ṭhiante zingah training pangngai a nei leh thei tawh.

Kum 39 mi Ibra chuan, "Kan squad hi ngun taka thlir chuan ka upa fal hle, inkhel tura inlan kum chawhrual pawh keimah vangin a lang upa ṭhin tih ka hria. Amaherawhchu ka player pui ten an la hriat ngai loh thil tam tak ka lo hre tawh a, chumi chu a ṭangkai ve ṭhin.

"Tunah hian dinhmun duhawm takah kan ding mek, mahse a tawp thleng tur chuan kawng zawh tur thui tak kan la nei. Serie A nomawi hi team pakhat tana siam a ni bik lo a, keini pawhin kan chawi thei a ni tih hi kan ring ngam tur a ni ang," a ti.

Italian champion Juventus chuan tun hnai season kua ngawt mai 'Scudetto' an la tawh a, team dang tan hmun an siamsak ve lo. Season kal laiah erawh Ibra awmna Milan hian hma an hruai mek a, nomawi inchuh boruak a ngaihnawm dawn.

Stefano Pioli enkawl Milan hian zanin dar 1:15 hian Genoa an lenchilh dawn, an match hnuhnung zawkah Parma nen an inhnehtawk avangin tun ṭumah chuan chak a pawimawh dawn.

Zanin Serie A inkhel tur dangah pahnihna Inter Milan leh pathumna Napoli an inhmachhawn dawn. Team pahnih hi champion tura rinkai zinga mi an ni a, chesual zawk nih a pawi thei ang.