Zaninah Blues hmalam chiang dawn

Jose Mourinho-a'n London club a chhuahsan hnuah Chelsea-in club pakhat chiah an hneh lo a, an ngam loh awm chhun chu Paris Saint Germain an ni. Zanin dar 1:15 hian UEFA Champions League second leg khelhah Blues leh PSG hi an inhmachhawn dawn a, Ten Action-ah a en theih ang.

Stamford Bridge-a inkhel tur hi a ngaihnawm dawn a, a pawimawh lamah erawh zanin dar 10:30-a Petrovsky Stadium lama FC Zenit Saint Petersburg leh Benfica inkhel tur nen a inang reng. Zenit hian Benfica hi Estadio da Luz-ah 1-0 in an hneh lo tawh a, inkhel hi Ten Sports-in an pe chhuak dawn.

Intawn tawhna

PSG leh Blues hi vawi sarih an inhmachhawn tawh a, vawi hnih ve ve an chak tawh a, vawi thum an inhnehtawk tawh.

Kum 2004 khan club pahnih hi group stage-ah an awm dun a, 2014-ah Chelsea-in quarterfinal-ah PSG hi an pet tla a, 2015-ah PSG-in Blues hi last 16-ah away goal hmangin an hneh thung.

Tun ṭumah hian PSG-in first leg-ah Zlatan Ibrahimovic leh Edison Cavani te goal hmangin Chelsea hi an mualah 2-1 in an hneh a, Dutch manager Guus Hiddink-a hote tan Paris-ah chak lo mah se John Obi Mikel goal khat hi minute 90 dang an khelh leh tur atan a pawimawh ang.

Team chanchin

Kurt Zouma, Pedro Rodriguez leh Radamel Falcao te an inlan thei lo chiang a, Chelsea captain John Terry dinhmun erawh a chiang lo. Veteran defender hi a inlan thei lo a nih chuan defence laiah Gary Cahill leh Branislav Ivanovic te a inkawp ang a, Baba Rahman chu left back-ah a awm a ṭul ang.

Diego Costa leh Cesc Fabregas te chu Stoke City an hmachhawn
ṭumin awltir an ni a, PSG an khelh hunah starting eleven an chang ngei tura ngaih a ni.

PSG lamin Blaise Matuidi leh Marco Veratti te chu inhliam vangin an inlan thei dawn lo niin a lang a, French club hian an midfielder pawimawhte pahnih hi chhawr ngei an duh avangin hun tawp thlengin an ngaichang ang.

Beiseina siamtu Hiddink

Chelsea supporter-ten Jose Mourinho chungah rinna an nghat a, club hotute erawhin Portuguese coach hi ring zo tawh loin nikum December thla khan Guus Hiddink an la lut.

Dutch manager hian Blues-a bul a ṭantirh lamah draw ngah deuh mah se league lamah chuan hneh loh a la tawng lo a, table-ah 10-naah awm tawhin season tawp hunah chuan dinhmun ṭha zawk an luah pha ang.

Chelsea boss Hiddink chuan, "Nilaini zanah chuan inkhelh
ṭantirh aṭangin chak duha kan tuihal a ṭul a, awmze nei takin khingpuite hi kan beih a ngai. PSG hi team ṭha tak an nih avangin tihsual hlek kan neih chuan min hrem thei ang. Player-te'n concentration an hloh a thiang lo a, inelna pawimawh a nih avangin chesual thei vek ni mah se ka player-te hi innghahna tlak an ni," tiin a sawi.

PSG lamin kartawpah an khingpui Montpellier nen goal awm loin an inhnehtawk a, amah-erawhchu Ligue 1-ah point 23 zeta an fal tawh avangin chhiarkawp dan hmangin an la champion lo a, an dinhmun hi a ṭha tawh hle.

PSG manager Laurent Blanc chuan, "Montpellier draw mah ila kan duh angin kan player kan siksawi thei a, player ṭhenkhat kan chawlhtir thei bawk. Chelsea hmachhawn tur hian inbuatsaih kan nei ṭha," tiin a sawi.

Chelsea lam boruak a ṭha chho a, PSG lamah tawnhriat nei ṭha Ibrahamovic, Cavani leh Angel Di Mari te an chet ṭhat lai a nih bawk avangin zanin inkhel tur hi a ngaihnawm ang.