Saina Nehwal a dam tawh

Indian shuttler Saina Nehwal chu a ke rek na vanga hun eng emaw chen a inkhelh theih loh hnuah badminton court-ah a hmel kan hmu thei leh dawn ta a, vawiin aṭanga khelh ṭan tur All England Championship-ah a inkhel ve leh dawn a ni.

World number 2 Saina hi hliam vangin kuminah a la inkhel mumal lo hle a, Syed Modi Grand Prix Gold-ah pawh a inlan lo. Nikum khan All England Championship-ah hian pahnihna dinhmun a lo luah tawh nge nghe.

A hliam a dam thu sawiin Saina chuan, "Ka ke rek leh kephah na vangin tun hnaiah ka inkhel tam thei lo a, tunah chuan inkhel turin ka inpeih leh ta. Ka fitness a ṭha bawk a, he hunah hian ka theihna zawng zawng ka hmang ang," a ti. Indian shuttler hian a match hmasa berah Michelle Li a hmachhawn ang.

Saina bakah hian Indian shuttler dang P.V. Sindhu pawh a inlan dawn a, world championship-a bronze medal vawi hnih lo dawng tawh Sindhu hian a match hmasa berah Porntip Buranaprasertsuk a hmachhawn thung dawn a ni.

Mipa lamah world number 10 Kidambi Srikanth chuan Commonwealth Games silver medallist Rajiv Ouseph a hmachhawn ang a, world number 26 H.S. Prannoypawhin Xue Song a bi tum bawk ang. Anni bakah hian Ajay Jayaram pawh a inlan dawn a ni.