T20 World Cup-ah India a champion thei dawn em?
February khan India chuan Twenty20 series-ah 3-0 in Aus-tralia an sawp a, a hnu lawkah Sri Lanka chu 2-1 in an hneh leh bawk. 2016 Asia Cup-a team panga inelnaah India-in an khing-pui zawng zawng hnehin champion nomawi an chawi leh a, cricket khawvel zawhna chu March 8-a khelh ṭan 2016 ICC World Twenty20-ah India an champion thei ang em? tih hi a ni ta.
A chhanna erawh tawite a ni a, chu chu 'aw thei ang' tih hi a ni. Tun hnaia an khelh dan, player neih dan leh sulhnu zawng zawngte enin India hi champion turin an ṭha tawk a, Pakistan, England, South Africa leh Australia-te an awm ve miau avang erawh chuan champion saa dah ngawt theih erawh an ni bik lo.
Mahni mualah
2016 ICC World Twenty20 hi India rama khelh a nih dawn avangin India tan champion a awlsam dawn tihna a ni chuang lo. ODI series, Test series leh Twenty20 series-ah te India hian mahni mual hmang thiam viau mah se World Cup-ah meuh erawh mahni hman thiam mual an sawi hleithei lo.
Kum 1987 khan India hian Pakistan nen 50 over ICC World Cup an lo inthlen ṭawm tawh a, mahse semifinal-ah England hneh loin an tla.
India, Pakistan leh Sri Lan-ka-te'n 1996 World Cup an in-thlen ṭawm leh a, India-in Calcutta khawpuia semifinal-ah Sri Lanka hneh loin mahni muala an khelh an chhawr ṭangkai thei lo.
Kum 2011 ICC World Cup-ah erawh India-in mahni mual pawh hmangthiam lo nih an duh reng bik lo a, Mumbai khawpuiah Sri Lanka hnehin an champion.
World T20-ah India-in ram dang tih theih loh tih an duh a nih chuan an champion a ṭul dawn a, 50 over ICC World Cup-a an lo champion tawhna an ram ngeiah T20 World Cup nomawi chawina hun ṭha an nei dawn - hei erawh theihnghilh loh a
ṭha, mahni rama T20 World Cup no-mawi chawi an la awm lo tih hi.
Kalphung
Kum 2007 aṭanga neih ṭan T20 World Cup hi vawi nga neih a ni tawh a, champion nawn thei team an la awm lo. T20 World Cup hmasa berah India-in an hmelma kumhlun Pakistan hnehin nomawi an chawi a, a hnuah Pakistan, England, West Indies leh Sri Lanka an champion.
March 8 - April 3, 2016 chhunga neih tur inelnaah hian team 16 an inel dawn a, ICC full member nihna nei team 10 chu tling chiangsa an ni. Hmun ruak paruk dang erawh ICC hnuaia associate member-te'n World Twenty20 Qualifier khelin team paruk an tling ve leh a ni.
Super 10
ICC T20I Championship ranking-a top eight chin chu Super 10-ah an tling nghal a, ICC hnuaia associate member aṭanga inelna hmachhawn tura in vaw kai Scotland, Ireland, Netherlands, Afghanistan, Hong Kong leh Oman bakah Bangladesh leh Zimbabwe-te'n group stage an khel dawn a ni.
Group hi pahnihah ṭhen a ni a, Group A-ah Ireland, Nether-lands, Oman leh Bang-ladesh an awm a, Group B-ah Scotland, Afghanistan, Hong Kong leh Zimbabwe-te an awm thung. Group pahniha a sang ber ve ve hian Super 10-a team pariat awmsate an zawm ve ang.
Super 10 hi Group 1 leh 2-ah ṭhen a ni a, group pakhatah team panga ve ve an awm dawn. Group 1-ah Sri Lanka, South Africa, West Indies leh England an awm a, Group B-a hmahruaituin an zawm ve leh ang. Group 2-ah India, Pakistan, New Zealand leh Australia awmin Group A-a hmahruaituin an zawm ve leh ang a,
Group 1 leh 2-a a sang pa-hnih hi semfinal an lut ang.