Newcastle Chetchhiat chhan Tu nge mawhpuh tur?

Premier League club Newcastle United-in Inrinni zan khan Bournemouth chu 3-1 in an hneh lo a, league table hnuai ber dawttuah awmin season thara Premier League khel zel turin an dinhmun a him ta lo hle.

Magpies hian player lakluh nan ringawt tun season-ah pound maktaduai 80 bawr vel an seng tawh a, an sum sen zat ngaihtuahin tuna an dinhmun hi lungawina chi a ni lo.

Newcastle legend Alan Shearer chuan a club hlui chu a ke ler aṭanga chhip thlengin a talbuai niin a sawi a, Magpies chairman hlui Sir John Hall chuan Newcastle siamṭha tur chuan manager Steve McClaren chu ban a ṭul thu a lo sawi ve mek bawk.

Fan-te an lawm lo

Sum tam tak seng chunga an result avangin Magpies fan-te an lungawi thei lo a, NUFC Fans Forum chuan club hotute hnenah lehkha an thawn hial.

Magpies fan-te hian club chu hma an sawn theihna tura ke pen chhuak turin an ti a, an coach McClaren ban hial sawi riin manager leh an player-te ngei pawh chuan an theihna zawng zawngin club tan ke an pen lo niin an sawi.

Newacstle fan-te lungawi loh-na hi a awm a, lungawi lo ngam tur pawh an ni - tun season Premier League-a an khelmuala an match khelh apiangah fans 52,000 vel pungkhawm ziah ang an ni a, Premier League club zinga average-a laka inkhel apianga ṭawiawmtu fans ngah ber palina an ni phak.

Dem tur McClaren?

June, 2015 khan McClaren-a'n St. James Park-ah kum thum cham turin contract a ziak a, Magpies a enkawl hnuah league match 28 kaihruai tawhin vawi ruk chiah hnehna a chanpui thei.

McClaren-a'n Magpies coach a nih tirh khan Premier League-ah pariatna chung lam nih an tum thu leh nomawi chawi ngei a tum thu a sawi a - tuna an dinhmun nena ngaihtuah chuan a thusawi lai hi a hnaih lai ber niin a lang ta.

Sir Alex Ferguson-a hnuaia inchher McClaren hian United-ah hlawhtling taka hun a hman hnuin kum 2004 khan Middlesbrough chu League Cup nomawi a chawipui a, FC Twente chu 2009-10 khan Dutch league-ah beisei loh takin a champion pui bawk.

Mahse English manager hi Wolfsburg, Nottingham Forest leh Derby County-ah te a hlawhchham a, sum ngah Magpies-in an ruai hi mi mak tih hlawh a ni.

England manager a nih laia McClaren-a assistant Martin Keown chuan, "McClaren hi coach ṭha tak chu a ni ngei a, mahse manager ṭha erawh a ni lo hulhual" tiin thiam takin English coach chu tactic leh sum lam khawih pawlh chi a nih loh thu a sawi.

Players lei fuh lo

Newcastle-in sum tam tak hmangin player an la lut a, an chet fuh lohna kawngah hian puh tur an awm a nih chuan Newcastle chief scout Graham Carr a ni ang.

Kum 71-a upa Carr hian Hatem Ben Arfa, Cheick Tiote, Yohan Cabaye, Papiss Cisse leh Sylvain Marveaux-te Tyneside-ah lo la lut tawh mah se tun season-a a player lakluh erawh a fuh lo hle.

Pound maktaduai 14.5 man Aleksandar Mitrovic-a'n Mag-pies goal khung theih loh buaina a chingfel thei lo a, pound maktaduai 12-a an lakluh Florian Thauvin chu Marseille lamah loan-a kir tir a ni.

PSV aṭanga pound maktaduai 14.5-a Magpies zawmtu Geor-ginio Wijnaldum leh pound maktaduai 8.4 man Chancel Mbemba-te'n mit tlung viau rih mah se pound maktaduai 12 man Jonjo Shelvey leh 12.5 man Andros Townsend-te'n beisei an la phak lo bawk.