Dan bawhchhia Sharapova a inpuang

World number 1 hlui Maria Sharapova chuan Thawhṭanni khan thuthar thehdarhtute hma-ah infiammite tana damdawi hman phal loh zinga mi 'mel-donium' a hman ṭhin ngei thu a sawi chhuak.

Grand Slam vawi nga cham-pion tawh Sharapova chuan meldonium hi kum 2006 aṭang khan a taksa hrisel lohna vangin a lo ei tawh ṭhin thu a sawi a, International Tennis Federation (ITF) chuan Russian star chungah March 12 aṭangin hremna lailawk an lek kawh ṭan ang a, a hrem dan tur tak erawh tih chian a la ni lo.

Kumina Grand Slam hmasa ber Australian Open-ah khan Sharapova hi quarterfinal-ah world number 1 Serena Williams hneh loin a tla a, January 26 khan a dinhmun enfiah niin March 2 khan a result hrilh a ni.

Latvia rama damdawi siamtu company pakhat Grindeks siam chhuah Meldonium damdawi hi tun hma chuan infiammite tan hman phal loh a ni ngai lo a, kumin Janury thla aṭang khan World Anti-Doping Agency (WADA) chuan hman phal loh zingah a telh chauh a ni. Zun (urine)
aṭangin infiammiten an hman leh hman loh a hriat chhuah theih.

Sharapova chuan, "Ka in-hnam-hnawih ngei a, midang mawhpuh buai tur an awm lo keima mawhphurhna a ni e," tiin a inpuang.

Sawi chhunzawmin Sharapo-va chuan, "Kum 10 chhung vel chu kan chhungkaw doctor-in min chawh angin hetiang lam damdawi hi ka ei tawh a, tun hnaiah ITF hnen aṭangin thu ka dawng a, hman phal loh a nih hi ka hre lawk lo a ni," a ti.

Insawifiah chhunzawmin zelin, "Nikum December 22 khan Wada hnen aṭangin email ka dawng a, chutah chuan damdawi hman phal loh chi hrang hrang rawn ziak langin tuna mi hi chu ka lo hmuh hmaih palh a ni," tiin a sawi.

Sharapova ukil John Hag-gerty chuan hremna hi kum li chhung zet a nih theih thu a sawi a, mahse hremna ti nep tur leh tihpalh a nih vanga theih tawpa an beih let tur thu a sawi. Kum li chhung an hrem a nih ngat chuan kum 28-a upa Sharapova hi tennis court-ah kan hmu tawh lo hial maithei.

Hetih mek laia hian Russian tennis federation hotupa Shamil Tarpishchev erawh chuan an player duhlai hian ama duhthu ngeia thil tisual a nih loh vang leh doctor-in ei tura a châwh vang zawk a nih avangin August thla a neih tur Rio Olympic-ah a inlan a beisei thu a lo sawi ve mek bawk.

Ka tihpalh

Nimin khan Sportswear com-pany lian Nike chuan thuchhuah siamin Sharapova nena an thawhhona chu zirchianna neih zawh a nih hma chu an ti tawp rih. An inkar hi an la ngaihtuah ṭhat leh tur thu an sawi bawk.

Forbes-in a tarlan dan chuan tun hnai kum 11 chhung chu Sharapova hi hmeichhe athlete zingah sum hailut hnem bera ngaih a ni a, tennis aṭang chauh hian pound maktaduai 26 vel hui lut nia ngaih a ni.

Kum 2005 August thla khan a vawi khat nan world number 1 dinhmun luahin tunah hian WTA ranking-ah pasarihna a ni mek. Tun hnaiah a ban na vangin a inkhel tam thei lo a, nikum July thlaa Wimbledon khelh hnuah tournament paliah chiah a la inlan leh thei.

April thlaa kum 29 tling tawh tur Sharapova chuan, "Kum li mi lek ka nih lai aṭangin tennis hi ka khel tawh a, ka ngainain ka hmangaih. He game hi tih hming chhiat ka duh lo a, fan-te ka ti lungngai hi hrehawm ka ti tak zet. Ka tih palh lutuk a ni. Hetianga ka hun tawp hman mai chu ka duh lo a, ka tan tennis khelhna hun a la herchhuah ve leh ngei ka beisei," tiin a sawi.

Sharapova Sulhnu

2001 : A career-a a match hmasa ber a khel.

2002 : A vawi khat nan WTA Tour event pahnihah a inlan.

2003 : WTA title a lak ṭan kum niin Tokyo Open leh Que­­bec City-ah te a champion a, Grand Slam tour­na­ment paliah a vawi khat nan a inlan vek.

2004 : Serena Williams hnehin Wimbledon-ah a cham^­pion a, a major title hmasa ber a ni nghe nghe.

2006 : Justine Henin hnehin US Open-ah a champion.

2008 : Australian Open-ah a champion.

2012 : French Open-ah champion in Grand Slam paliah a champion kim chiah.

2014 : French Open-ah champion lehin tun dinhmunah a Grand Slam title lak hnuhnun ber a la ni rih.

2016 : Australian Open-a Serene Williams a hneh loh hnuah damdawi hman phal loh 'meldonium' a hman thu a sawi chhuak.

Tennis Star Dang pawh an bang bik lo

Andre Agassi Khawvel mipa tennis player langsar berte zinga mi Agassi hian kum 1997 khan 'crystal methamphetamine' a lo hmang ru tih hriat chhuah a ni a, Grand Slam vawi riat champion thei hian a tirah chuan ama assistant hneh aṭangin tihpalh thil thuin a inpalh niin sawi mah se tennis a chawlh san hnuah a phatna chu dawt a nih thu a sawi leh hnuhnawh.

Greg Rusedski Great Britain number 2 lo ni tawh ṭhin Rusedski khan kum 2003 khan infiammite tana damdawi hman phal loh 'nandrolone' a lo hmang tih hmuhchhuah a ni a, ani hi kum hnih chhung inkhel thei lo tura hrem a ni.

Martina Hingis Grand Slam vawi nga champion tawh Hingis pawhin harsatna a lo tawk ve tawh a, kum 2007 Wimbledon-ah khan 'cocaine' a hmang tih hmuh chhuah a ni. Swiss star hian hetiang thil a tih loh thu sawi mah se kum hnih chhung inkhel thei lo tura hremna a pumpelh phah ta chuang lo.

Richard Gasquet French tlangval Gasquet pawhin thla 12 chhung hremna a lo tuar tawh a, ani pawh hi kum 2009 March thla khan 'cocaine' a hmang tih hriat chhuah a ni. International Tennis Federation chuan Gasquet hian a tum reng vangin thil sual a ti lo tih an hre chhuak a, hmeichhia a hmelhriat ngai loh a fawh vanga kai a ni tih an hriat avangin hremna pawh hi midang aiin a rei lo deuh nia ngaih a ni.