Odion Ighalo - United tana khel tura a zinkawng

Odion Jude Ighalo hi June 16, 1989 khan Lagos, Nigeria-ah a piang. Ighalo seilenna hmun tak Ajegunle hi mi hnuaihnung zawkte awmna a ni a, mi rothap tak tak an tam avangin naupan sei lenna atan a awhawm lo. 

Ighalo pawhin, "Ajegunle-a kan awm lai chuan khawsak a harsa a, ei tur a vang. Pathian zarah ka nu leh paten kan mamawh tur min phuhruk a, kan khawsa ve ṭawk ṭawk," tiin a naupan lai hun a sawi.

Ighalo pa Paul Ighalo-a'n hna neih loh a ngah a zawk a, a nu Martina-i'n dawr te a siam thung. A nu hian a pawisa khawl aṭangin boot a leisak a, a pa erawhin school a kal theihna tur lam a ngaihtuah thung. A nu leh pa te ngaihdan a inhmu lo a, a pain lehkha zir tura a ti pawh hi mak hran lo.

Ajegunle-ah drug zuar an tam a, Police silai muin drug zuar leh footballer a hre hrang lo. Paul Ighalo hian a fapa hi silaimu vanga thih a hlau pawh a ni thei ang.

Amaherawhchu Ighalo hi Kanu Nwankwo, Samson Siasia, Jay Jay Okocha, Samuel Eto'o leh Andy Cole te ngaisang chunga sei lian a ni a, striker nih chu a naupang lai aṭanga a châk a ni.

Ighalo hian football khel turin thutlukna a siam a, zirna a bansan. Retheihna hneh turin football a thlang a, hausak erawh a hlat hle - rilṭam chunga inkhelh chang pawh ngah hle. Lagos kawtlai vela a inkhelh lai chuan Premier League-a khelh hi a beisei ngai lo.

Ighalo te inkhelhna hmun 'Maracana' tiha hming an vuahah chuan Emmanuel Amunike leh Kanu Nwankwo te pawhin football career ṭantirhin an inkhel tawh ṭhin a, football hmanga hausak a beisei hi a mak hran lo. Nigerian striker hian Prime FC-ah professional football a khel ṭan a, Julius Berger-ah a insawn.

Thilmak a thleng a, FIFA agent Marcelo Houseman chuan Ighalo hi a hmu fuh a, Norway-a trial turin a hruai. Argentine pa puihna zarah Ighalo hmalam a êng chho a, trial hi paltlangin Lyn Oslo-in an la a, match 20-ah goal kua a khungsak.

Kum khat chauh a awm tihin Udinese-in an lalut a, Serie A-ah hming chher tawk lo mah se loan hmanga a khelhna Granada-ah chuan legend a tih theih. Spanish club hi La Liga khel turin a kai pui a, Championship club Watford-in an lalut - a naupan laia a mitthla ṭhin Premier League a hnaih ta hle.

Kum 2015 khan Watford chu Premier League khel turin an inpet tling a, Ighalo hi player pawimawih niin match 35-ah goal 20 a khung. Nigerian striker hian Watford tan 2015-16 Premier League khelin match 37-ah goal 15 a khung thei a, mahse 2016-17 season khan match 18-ah goal 1 lek khungin Chinese Super League lamah a kal. 

CSL-a kal hnuin hlawhtlinnain a um zui a, Barcelona hialin sawm mah se a chhuak duh lo. Mahse, January-ah Marcus Rashford inhliam vanga striker mamawh United an lo lang a, a club ṭan em em sawmna a hnar phal lo. Ighalo hian May 31 thleng loan-in a khel dawn a, contract-ah hian tun laia loan contract-a lar tak angin a tawpa a ngheta lei theihna ziah tel a ni lo thung.

Ighalo-a'n United zawm duh hian a hlawh pawh a ti hniam hial a, heti taka Old Trafford-a kal châk a nih avang hian lawm pawh hlawh hle. United jersey haa a inlan hmasak berah Chelsea an hmachhawn a, injury time-ah Anthony Martial a thlak. 

Ighalo hian goal khung nghal lo mah se Nigerian striker hian Martial, Rashford leh Mason Greenwood te neih loh a nei a, ball a chelh thei a. Solskjaer-a'n 'striker tak tak' chhawr tur a nei ta a, Chelsea nena an inkhelh ṭum hian inlan rei lo mah se hun khawhralhna ni paha midfield-a ball an ti muang ve chu United ṭantuten hun rei tak an hmuh tawh loh a ni.

Kum 30 mi Ighalo a tlangnel chho zel a, Club Brugge an hneh ṭumin United tana a goal hmasa ber a khung. FA Cup-a Derby County nen an inhmachhawn ṭumin inkhelh hmain Wayne Rooney chanchin hlir an sawi a, inkhelh banah erawh goal hnih khungtu Ighalo chanchinin sawi a hlawh zawk a, United tana a inlan hnuhnun berah pawh LASK lakah goal hmahruai a khung.

United ṭantuten Ighalo an ngaina chho a, tunah erawh a hmalam hun a chiang ta lo. Premier League hi an khel chhunzawm thei a nih pawhin Solskjaer leh a hoten Ighalo tel loa inlena a chhunzawm pawh a ṭul thei a ni.