Champion Services hnehtu Mizoram hun a tawp ta!
Mizoramin Santosh Trophy vawi 70-naa an match hnuhnung berah champion lai Services 2-1 in an hneh a, inkhel dangah Jammu & Kashmir-in Railways 2-1 in an hneh ve bawk.
Services hi kum 2012, 2013 leh 2015-a Santosh Trophy-a champion an ni a, an champion loh kum 2014 hian Mizoram an champion thung. Kuminah Mizoramin Maharashtra an hneh loh avangin semi final luh beiseina nei tawh lo mah se, an match hnuhnung berah Indian football-a team ṭha Services an hneh ta tho a ni.
Mizoram coach HC Zarzoliana chuan Services an hmachhawn hmain beisei nei tawh lo mah se state hming ṭhat nan inelna tawp thlenga an ṭan tur thu a sawi a, an result hmangin coach thusawi dikna hmuh a ni.
SEC Railway Stadium-a inkhelah Services-in first half-ah goal an khung a, Mizoramin second half-ah MS Dawngliana leh Lalkhawpuimawia goal hmangin an lehthal. Services chak loh hi a pawi hle a, Group A hmahruaitu chu Maharashtra a ni ta a, semi final-ah Services hian Group B-a ṭha ber an hmachhawn a ṭul dawn ta a ni.
Mizoram hian match hmasa berah Railways (1-1) in an draw a, Maharashtra (0-1) a an hneh loh zui avangin J&K (4-1) leh Services hneh zui mah se semifinal an thleng zo lo. Mizoram team hi Nagpur leh a chhehvela Mizo awmten an match hmasa ber aṭanga hnuhnung ber thlengin ṭha takin a ṭawiawm.
Eng nge an sawi?
Mizoram manager T Vanlalhluna chuan, "Services kan hneh hi a lawmawm takzet. Tla tawh mah ila anni lam hi group hmahruaitu nih tum an ni a, an ṭang em em a, keini pawh champion lai hneh ngei kan tum ve bawk. Nagpur Mizote'n min ṭawiawm ṭha a, kan lawm khawp mai. A tawp ni-ah pawh min thlahthlam lo a, inkhelh banah pawh kan chak min la lawmpui cheu a ni!" a ti.
Mizoram tlak dan sawifiahin team manager chuan, "Kan tla tih piah lamah sawi tur hi a awm ṭhin a. Railways kan draw kha a pawi takzet a, kan chak theihna tur inkhel a ni. Maharashtra kan hneh lohna kha first half-ah chance
ṭha vawi thum kan hlah a, kan goal thun turah keeper-in red card hmuh huamin penalty area pawnah a dang a, red card a hmu ta ngei a, goal a venghim thung a. Second half-ah player 10-a khel si khan an goal ven ringawt hnaah an nei a, counter attack-ah min nawr thut a, freekick an hmu a, an pet goal ta mai a, a ho zo ta vek a ni. Chutah Services leh Maharashtra kha in-draw ta se semi final lut turin a tawpa kan chak hi a tawk mai a; nimahsela 0-0 a nih reng hnuah injury time-ah Services-in an thun leh si a, kan tla chu a ni der mai. Mizo mipuite chungah thupha kan chawi a, kan vanneih ṭum chu ni se champion thei tur team chu kan niin kan inhria," tiin a sawi.
Hmahruai thei Tamil
Group B-ah khelh tur nei tawh lo Goa-in point 10 hmuin hma an hruai mek. Vawiin hian Tamil Nadu leh Punjab an inhmachhawn dawn a, Tamil hian hnehna an chang a nih chuan group hmahruaitu an ni ang.
Inkhel dangah West Bengal leh Assam an inkhel dawn a, Nagpur University Stadium-a inkhel tur result hian inelnaah nghawng a nei thei tawh lo.
Santosh Trophy group stage hi vawiin-ah khelh zawh a ni dawn a, semifinal hi March 11-ah khelh a ni ang.