India squad-ah Mizo pathum

National team coach Stephen Constantine chuan FIFA World Cup qualifier-a Iran leh Turkmenistan an tum hun atan player 28 a ko a, chung zingah chuan Mizo pathum an tel.

Ṭum dang ang thoin Mohun Bagan striker Jeje Lalpekhlua leh Bengaluru defender Lal-chhuan-mawia koh tel an ni a, Chaltlang tlangval Mal-sawm-zuala hming a lang tel bawk.

Mizo midfielder Sawmtea hian season ṭantirh khan AIFF Academy aṭangin Bengaluru FC a zawm a, tun season I League-ah match rukah a inlan tawh a. Bengaluru midfielder hian AIFF Academy a zawm hmain Chanmari FC leh SYS FC tan a lo khel tawh ṭhin bawk.

India hi Group D-ah awmin match ruk khelh tawh aṭangin point thum chiah an la hmu a, World Cup-ah beisei tur nei tawh lo mah se Asian Cup qualifier a nih nghal avangin an match hmabak hi a la pawimawh. March 24 hian Tehran-ah Iran an hmachhawn ang a, March 29 khian Kochi-ah Turkmenistan an mikhual leh ang.

National team hian March 16 aṭangin Delhi-ah training an nei ang a, March 21 khian Tehran lam panin India ram an chhuahsan ang.

English coach Constantine chuan, "Mohun Bagan-in March 16-ah AFC Cup an khelh dawn avangin camp hi ni khatin an zawm tlai ang a, Bengaluru FC-in khualmuala match an neih avangin an remchan hmasak berah camp hi an rawn zawm thung ang. SAFF Suzuki Cup-ah nomawi kan chawi a, result ṭha kan neih chhunzawm a ṭul a ni," tiin a sawi.

Probable Squad

Goalkeepers (4) : Subrata Paul, Gurpreet Singh Sandhu, Karanjit Singh, TP Reheneesh.

Defenders (8) : Aiborlang Khongjee, Augustine Fernandes, Arnab Mondal, Pritam Kotal, Sandesh Jhingan, Rino Anto, Narayan Das, Lalchhuanmawia.

Midfielders (12) : Pronoy Halder, Bikash Jairu, Cavin Lobo, Rowlin Borges, Allwyn George, Md. Rafique, Malsawmzuala, Francis Fernandes, Harmanjot Singh Khabra, Udanta Singh, Vineet Rai, Seityasen Singh.

Forwards (4) : Jeje Lalpekhlua, Sunil Chhetri, Sumeet Passi, Halicharan Narzary