Inkhelh châk tawh Inzaghi

Lazio manager Simone Inzaghi chuan Serie A khelh a châk leh tawh thu a sawi a, hmabak la ngah viau mah se nomawi beiseina an la neih thu a sawi lang tel bawk.

Covid-19 vanga an chawlh lailawk hma khan Lazio hi pahnihna an ni a, champion lai leh hmahruaitu Juventus an phak lohna chu point khat chauh a ni; match khelh hmabak 12 lai a la awm avangin an dinhmun hi inthlak thei reng a la ni.

Inzaghi chuan, "Kan inkhel chhunzawm thei tur hi ka lawm, keini ang bawkin club dang pawhin league khelh zawh ngei hi an duhdan a ni. Inbuatsaihna fimkhur takin kan nei a, player leh coach-te chuan hri laka fihlim turin theihtawp kan chhuah.

"Hun harsa leh khirhkhan tak kan tawk a, chumi hnuah lawmna tur lam a rawn awm leh ṭan mek hi a lawmawm," a ti. Serie A hi an khelh chhunzawm hun tur tak a la chiang lo a, league erawh an khel zawh ngei an tum.

Italian club-te hian mimal training an kalpui deuh reng hnuah, kar hmasa aṭang khan team training pawh an nei thei leh tawh. Bundesliga hnung zuia khelh chhunzawm tumin hma an la mek; August thlaah season hman zawh a, September aṭanga season thar khel leh turin ruahmanna an siam.

Italian manager chuan sawi zawmin, "Infiamna hmuna awmte hi chu kan him dam viauin ka hria, kan zingah hri kai an awm a nih erawh chuan a buaithlak deuh mai thei. Harsatna tawk an awm palh a nih pawhin team pumpui ni loin, mimala chinfel dan a awm ka beisei," a ti.