Bayern Munich mualah Wolfsburg

Season dang ang chu ni se, tun ang hunah chuan Bundesliga table chung berah Bayern Munich awmin champion tura rinkai ber an ni ang. Tunah erawh German football inelna sang bera hmahruaitu chu Bayer Leverkusen an ni.

German champion hian zanin dar 1:00 hian Allianz Arena-ah Wolfsburg an mikhual dawn. Leverkusen pawhin khualmualah Cologne an lenchilh dawn a, champion tum pahnih tan point thum hmuh a pawimawh ang.

Bayern hian an match hnu-hnung berah point thum an hlawhchhuak zo lo, an mikhualna ramah Union Berlin nen 1-1 in an inhnehtawk. Hansi Flick-a naute hi si phurh suttu zawk an ni a, an tlarhnung phui lo hi an siamṭhat ran a ngai.

An tlarhnung a phui loh bakah Bayern hi a goal nawr a na tawk lo. A tawi zawnga sawiin European champion hian season hmasa an game ang kha an la phak lo, midfielder pawimawh Joshua Kimmich inhliamin nghawng a nei lian tih a lang.

Kimmich leh Niklas Sule ten team training an zawm leh thei tawh a, chanchin ṭha a ni. Mahse, manager Flick-a'n a player damkawr chungchangah a hmanhmawh loh tur thu a sawi tawh a, zaninah an inlan a nih pawhin minute 90 chu an khelh a la rinawm loh.