Shanghai leh United-in Odion Ighalo an inchuh

Covid-19 vangin Premier League khelh theih a ni lo a, hripui vanga inelna chawlh a nih chhungin Manchester United striker Odion Ighalo chuan loan hun a hmang zo dawn.

Nigerian striker hian tunkar hian loan hun a hmang zo dawn a, English club leh Chinese club hi an inbe rem thei  lo a nih chuan Ole Gunnar Solskjaer-a'n player pawimawh a chan dawn tihna a ni.

Khawtlang media-te tarlan danin United hian thla thum chhung kawl chhunzawm turin Shanghai Shenhua an dawr a, Chinese club hian an remti lo. An inbiaknaah hian hmasawnna a awm lo a nih chuan Ighalo hian United tana a match hnuhnung ber a khel der tawh tihna a ni thei ang.

Manchester United player leh staff zingah Covid-19 vei an awm lo a, training pawh an nei leh tawh. Odion Ighalo pawhin kar liam ta khan Carrington-ah training a zawm a, United tan training mah se a khel zui zel ang em tih a chiang lo.

Nigerian striker chungchangah hian Shanghai Shenhua-in thutawp an nei a, Chinese club lian hian lak let duhin contract thar an zawrh. Watford striker hlui hian kum hnih chhung atan contract a pawtsei a nih chuan kar khatah £400,000 a hlawh ang.

United hian Ighalo lakluh nan loan fee-ah pound maktaduai 3 an seng a, kar khat hlawhah £130,000 an tum. Inremnaah hian Ighalo hi May 31 thleng cham tur a ni a, English club hian August thleng chamtir an duh mah se Chinese club-in an remti lo niin thuthang a awm.

Shanghai Shenhua hian pound maktaduai 20-a hralh an phal tih sawi a awm a, hemi chungchang erawh club pahnih inkarah sawi a la ni lo. United-in Ighalo an lak chhan pakhat chu Romelu Lukaku leh Alexis Sanchez thlakna tur player langsar an lalut lo a, an player pawimawh Marcus Rashford a inhliam bawk avangin risk an la.

United-in an tifuh Ighalo hian league-ah goal la khung lo mah se FA Cup leh Europa League-ah goal hnih ve ve a khung tawh a, Nigerian striker hi Manchester United ṭantu a nih bawk avangin club ṭantute chuan cham zel turin an duh ngei ang.