La Liga hmahruaitu mikhual tur Barca
Tun season-a beisei phak lo Barcelona chuan zanin dar 1:30-ah league match khel turin Real Sociedad an mikhual dawn a, Ronald Koeman leh a naute tan fiahna pawimawh a ni ang.
Catalan club hian tun season-ah tluk leh din an fawm a, an tho hlen tawh dawn emaw tih hnu lawkah an chak loh leh ṭhin avangin hriatthiam an harsa hle.
Barca hian rin loh taka Cadiz an ngam loh hnu lawkah Levante chu 1-0 in an hneh leh tawh a, mahse Levante hi table-a 18-na ni lai an nih laiin Sociedad erawh hmahruaitu an ni - a awlsam dawn lo.
Messi buaina
Barcelona chanchin sawi chuan Lionel Messi a sawi loh theih ṭhin loh a, nipui laia chhuah tum forward hi mi tam tak chuan tun season-a Barca boruak ṭhat loh chhanah an puh - Paris Saint-Germain leh Manchester City nen sawizawm a ni mek.
Hetihlai hian Spanish media-te chuan Messi-a agent leh a pa ni bawk Jorge Messi chuan Qatar-ah PSG thuneitute a hmu niin an sawi a, Jorge hian he puhna hi a pha nasa hle. Messi pa chuan, "September aṭang khan Argentina-ah ka la awm char char," a ti.
Barcelona hi Champions League last 16-ah PSG nen an intawng dawn a, Messi ṭhian ṭha leh a khelhpui leh châk em em Neymar chuan, "Kan inhmu leh thuai dawn nia, ka ṭhian," tiin instagram lamah a lo ziak bawk - he boruak zawng zawng hian Barca a pui lo ang.
Sociedad an ṭha
Real Sociedad-in David Silva an neih avangin midfield lamah chuan buaina an nei lo tih a chiang a, Spanish midfielder hi kum 34 mi ni ve tawh mah se a la hmuhnawm reng a, Barca tana buaina thlen turin a la ṭha tawk.
Kum 23 mi forward Mikel Oyar-zabal hi theihnghilh loh a ṭha a, tun season league match 11-a khelh tawhah goal sarih khungin assist vawi hnih a nei thei - Barca tlarhnung tan ven bik a sual lo ang.
Winger Portu chanchin hi Koe-man tan a naute hnena hrilh tam a pawi lo. Kum 28 mi winger hian league match 13-ah goal li khungin assist vawi hnih a nei tawh - mipui mit fukna ber tur erawh Messi bawk a ni a, Argentine forward hian a season hman ṭhat loh ṭumah pawh league match 11 khelin goal nga a khung a, assist vawi hnih a nei leh tawh.