Roma hnehtu Real an ropui

Cristiano Ronaldo chuan tun season-a a goal 40 na a khung a, Thawhlehni zan khan Real Madrid chuan an mikhual AS Roma 2-0 in an hneh a, Cham-pions League last 16 an paltlang.

Real tan hian Ronaldo bakah James Rodriguez chuan goal khat a thawh a, a zawna a vawi ruk nan quarterfinal an inhlangkai a ni. Portugal captain hian tun season Champions League-ah bik goal 13 zet a khung leh der tawh.

February 17 khan Stadio Olimpico-ah team pahnihte hian first leg an lo khel tawh a, hemi ṭum hian Real hian 2-0 bawkin hnehna an chang. Inkhel pahnih belh khawmin Spanish club lian hi 4-0 in an chak a ni.

Santiago Bernabeu-a in-khelah Real Madrid lamin goal khung an harsat a, first half chhungin vawi 18 ngawt shot nei mah se Roma goalkeeper Wojciech Szczesny an paltlang thei lo vek. Roma tan Edin Dzeko leh Mohamed Salah ten an siphurh sut na hun an nei a, mah se an hun ṭha an chawr
ṭangkai thei bik lo.

Champions League title vawi 10 la thei Real Madrid-in second half-ah an nawr na zual a, winger Lucas Vazquez siamsak chu minute 64-naah Ronaldo hian an hmahruaina goal a tan a khung a, Portuguese forward hian goal a khung aṭanga minute li hnu lekah Rodriguez goal khung tur a siam sak zui bawk.

Bale a dam

Khawvela player man to ber Gareth Bale chuan January 17 hnua a vawi khat nan Real tan inkhel bul a ṭan a, chawn na vanga a inkhelh theih loh reng hnuah Inrinnia Celta Vigo 7-1 a an sawp ṭum pawhin substitute bench aṭanga tlan lutin goal khat a khung.

Welsh international hian Roma nen an inhmachhawn ṭum hian mual dinglam sir aṭangin cross ṭha tak tak nei mah se a ṭhianten goal-ah an chantir thei lo a, striker Karim Benzema khel thei nise a dan a dang maithei.

Goal khungna tur hun ṭha vawi tam tak a hmuh aṭanga vawi khat chauh khung theitu Ronaldo chu inkhelh banah Real fan-ten an 'boo' nghe nghe. Portugal captain hi a ṭawngkam vangin Celta an hneh ṭumin Real supporter-te hian an lo au el tawh bawk.

Real captain Sergio Ramos chuan an thiampuipa hi chhan nghalin, "Bernabeu-ah fan-ten an boo che a nih chuan i lak aṭangin thil ṭha zawk an beisei tihna a ni. Ronaldo hi khelmual chhunga a awm tawh chuan goal khung duh reng mi a ni a, chutiang tur chuan a bei ṭhin. Fan-te hi kan chakna hnar a ni tehmeuh mai a, chutihrual chuan thil an tih hma hian ngaihtuah hmasa ṭhin se a ṭha khawp mai," tiin a sawi.

Manager-te thukhawchang

Roma coach Luciano Spa-llet-ti chuan, "Real Madrid khelh ṭhat ber ni a ni lo a, khati chunga goal kan khung thei lo kha chu a pawi a ni. Kan chak lo a nih chuan thinrima, natna min thlen ve tur a nih laia ka player-te awm dan ka hmuh kha chuan a lawmawm hran lo," tiin a naute chu chak tum ngam tawk lohah a puh.

Real coach Zinedine Zidane chuan, "Inkhel hautak tak a ni a, kan khingpuite kha an che rang em em a fimkhur pawh a ṭul hle. James leh Ronaldo ka lawm pui a, anni ang player ṭha tan chuan goal khung hi a pawimawh a ni. Fan-te khan kan lak aṭangin kha aia ṭha zawk kha an beisei a, anni hi chuan engtik lai pawhin a ṭha thei ang ber hmuh an duh a ni," tiin a sawi.

Ngaihnawm

• Cristiano Ronaldo hian Champions League match hrang hrang 61-ah goal a khung thei a, ani aia record nei ṭha an awm lo. Ronaldo hnuaiah hian Raul (56) leh Lionel Messi (51) te an awm.

• Ronaldo hian Champions League-a Roma a hma­chhawn hnuhnung paruk­ah goal nga a khung.

• Keylor Navas hian a zawn­in Champions League match riat chhung goal a chhuah tawh lo a, a zawna goal kaw chhuah lo Arsenal keeper Jens Lehmann chiah tluk loh a nei.

• Thawhlehni zan khan Real Madrid hian goal khung tumin vawi 37 ngawt an pet a, an khing­pui Roma leh inkhel danga Gent leh Wolfsburg te inhmachhawn team pathum ai hian goal khung tuma an ball pet zat a tam zawk.