Pressure kan nei lo - Riyad Mahrez

Leicester winger Riyad Mahrez chuan Premier League-a point nga laia hma an hruai avangin pressure an neih loh thu a sawi.

Foxes hian Inrinni khan Ma-hrez-a goal hmangin Watford 1-0 in an hneh a, Algerian winger hian league-ah goal 15 a khung tawh.

Kum 25-a upa Mahrez chuan, "Kan hun tawn mek hi nuam kan ti a, pressure kan nei lo a, hlauhthawnna kan nei lo. Kan tih ṭhin dan pangngaiin football kan khel a, kan match khelh hmabak chauh ngaihtuah hi kan tihtur a ni," tiin club website a hrilh.

Algerian international Mahrez chuan sawi chhunzawmin, "Tuna kan kal dan anga kan kal chhunzawm hi a ṭul a ni. Result ṭha tak kan neih hian football bak ngaihtuah hi a awl ṭhin a, tunah rih chuan hmahruaitu nih vangin kan buai phah lo. Keimah chauh hi ka hlim lo a, team pumpui hi kan hlimin kan phur a ni," a ti.

Leicester hian Premier League-ah match kua khelh hmabak an nei a, an la hmachhawn tur club-te chu Newcastle United, Crystal Palace, Southampton, Sunderland, West Ham, Swansea City, Manchester United, Everton leh Chelsea-te an ni.