Chinese Super League-China ramah player langsar an lut hnem

January-a thlasik transfer hawn a nih khan China ramin footballer langsar ṭhenkhat kawl sa mah se football khawvelah sawi a hlawh meuh lo.

Mahse, thlasik transfer a ral meuh chuan Chinese Super League club-te'n pound mak­taduai 200 chuang an seng a, khawvelin khawchhak ram lam hi a hawi lo thei lo.

Khawvela football league thlasik transfer-ah Chinese Super League lam hian sum an seng hnem ber lawr lak a, sum seng hnem ṭhin Premier League meuh pawhin an phak loh avangin China ramah sum a tam tih a chiang.

Chinese Super League match hmasa ber hi March 4 khan khelh ṭan a ni a, player langsar zingah Gervinho, Demba Ba, Ramires, Jackson Martinez, Tim Cahill-te'n goal khat ṭheuh an khung a, Liverpool nena sawizawm hlawh hman Alex Teixeira leh Fernandinho-te'n goal hnih ve ve an khung nghal bawk.

China-ah tute nge kal?

January transfer-a China pantu zinga player man to ber chu Alex Teixeira a ni. Liverpool pawhin lakluh tuma an dawr Brazilian attacking midfielder hian pound maktaduai 38.4-in Jiangsu Suning a zawm a, Jiangsu hi pound maktaduai 25-a Chelsea mid­fielder Ramires la luttu tho an ni.

Porto tan a khelh laia khaw­vela striker hlauhawm an sawi apianga an sawi tel ṭhin Jackson Martinez-a'n Atletico Madrid a pan hnuin La Liga-ah a beisei ang hlawhtlinna a hmu lo a, China ram lam a hawi. Colombian striker hian Guangzhou Evergrande chu pound maktaduai 32-in a zawm.

January transfer-a China pan player langsar zingah Inter Milan aṭanga Shanghai Shenhua pantu Fredy Guarin, Paris St-Germain aṭanga Hebei China Fortune pantu Ezequiel Lavezzi leh Lavezzi nena kheldun tur Roma winger hlui Gervinho-te an tel.

Distinct Agency (sports ma­nage­ment lam buaipuitu) founder Emanuele Palladino chuan, "Tun January transfer ang reng reng hian Chinese Super League-ah sum a la tam ngai lo. CSL buaina awmchhun chu club pakhat tan foreign player neih theih zat bi tuk a ni hi a ni. He dan hi an thlak a nih chuan CSL hmalak dan tur hi ngaihtuah ngam pawh a ni lo," tiin sum lamah Chinese Super League club-te an buai loh thu a sawi.

Player langsar

Kumin January transfer hawn a nih hma khan player langsar engemaw zatin Chinese Super League hi an lo pan tawh a, kumin thlasik transfer-a thawm an neih ang em erawh hi chuan thawm an la nei na ngai lo.

Kum 30-a upa Asamoah Gyan chuan Shanghai SIPG tan a khel mek a, Ghana international hian kar khatah pound 210,000 vel a hlawh avangin CSL-ah sum a tam tih a chiang.

Shanghai Shenhua tan Dem­ba Ba chuan season hmasa khan league match 11 a inlanah goal ruk a khung a, Chelsea striker hlui hian CSL club tan a la khelh chhunzawm zel dawn.

Kum 27-a upa Paulinho-a'n Guangzhou Evergrande a pan khan khawvel mak tih a hlawh a, Brazilian midfielder hmabak eng tak nei nia an sawi ṭhin hian Europe-a hmingṭhana aiin China rama sum tam tak a thlang zawk a, Brazilian coach ropui Luiz Felipe Scolari-a enkawl club tan hian season hmasa khan kum li daih contract a ziak.

Thla hmasa lawk khan Hang­­zhou Greentown tana khel mek Tim Cahill chu Shanghai Shenhua-in a contract neihlai an tihtawp sak a, zângnadawmana an pek zat pawisa hi pound maktaduai 2.8 vel a ni.

Everton midfielder hlui hian China ramah pawisa a tam tih a chiang a, Chinese Super League chuan khawvel transfer record fee khum khawpa player an la lakluh hial a rin thu a sawi.

Entu lam

Kum 2013 chhiarpuia a lan danin China ramah mipui tluklehdingawn 1.357 an awm a, heti zat mipui awmnaa an infiamna ngainat ber entu hi an tlem chhe thei lo.

Season hmasa khan Chinese Super League-ah hian inkhel apiangin mipui 45,889 pungkhawm ziah ang an ni a, CSL neih ṭan a nih kum 2004-a inkhel apianga mipui 23,636 pungkhawm ziah ang nena chhut chuan a ṭhanna hi a sang hle.

Hmabak

Tun dinhmuna a lan dan chuan Chinese Super League hian kumin January transfer-ah hian an la duhtawk mai dawn lo niin a lang.

Nipui transfer inhawn ruala China pan tur an sawi langsar zingah Chelsea-in a contract thar an zawrh loh John Terry-a tel a, Blues legend hian kum khatah pound maktaduai 20 vel hlawh tura sawmtu Chinese club a nei niin an sawi.

Manchester United captain Wayne Rooney-a'n tun hma a pha tawh lo a, season thara a pan tur nia an sawi chu Chinese Super League club Shanghai SIPG a ni. China club hian English club-a kum khata pound maktaduai 13 hlawhtu hi kum khata pound maktaduai 25 hlawhtir an inhuam niin an tarlang.

Manchester City-in season tharah coach thar Pep Guardiola an nei dawn a, chumi in a nghawng tel chu Yaya Toure a ni.

Ivory Coast international hi Guardiola-a'n Barcelona-a a chhawr duh loh hnu a nih avangin season tawp rualin English club hi chhuahsan tur angin sawi a ni a, Chinese Super League club zingah kum khata pound maktaduai 30 hlawh tir huam an awm niin khawthlang media-te chuan an tarlang leh der tawh!

Premier League-a hming lo chher tawh player zingah Everton midfielder Steven Pienaar, Aston Villa defender Joleon Lescott, Newcastle midfielder Cheick Tiote leh striker Papiss Cisse-te chu January transfer khan Chinese club ṭhenkhatin an rim a, a vawi khatnaah hlawhtling lo mah se heng player-te hian season tharah sum tamna Chinese Super League an pan a nih pawhin a mak lo ang.