Dortmund hmachhawn tur Tottenham
Zanin dar 11:30 hian Premier League champion inbeisei mek Tottenham chu Bundesliga club ṭha Borussia Dortmund khelmualah Europa League last 16 khel turin an leng lut dawn. Inkhel hi Ten Action-ah live a ni dawn a, Ten Sports lamin zan dar 1:35-a Spanish club pahnih Athletic Bilbao leh Valencia te inkhel an pechhuak bawk ang.
Tottenham leh Dortmund te hi Euro-pean competition-a an vawi khat intawnna tur a ni a, friendly match erawh vawi li lai lo khel tawhin Spurs hian vawi thum hnehna an chang a, vawi khat an inhneh-tawk thung.
Dortmund hian an khelmual Signal Iduna Park hi an hmangthiam hle a, tun season-ah vawi khat chiah chak loh an la nei. Europa League group stage match hnuhnung berah PAOK chu 1-0 in an hneh lo a, hei pawh hi knockout round an luh chian tawh hnu a ni.
Chak zo lo pahnih
Premier League-a pahnihna dinhmun luahtu Spurs hian league-ah champion an la beisei a, match 29 khelh tawh aṭanga point 55 hmuin hmahruaitu Leicester City chu point li chiahin an phak lo. Mahse, Mauricio Pochettino naute hian an match hnuhnung ber North London Derby-ah an mikhual Arsenal chu 2-2 in an inhnektawk pui.
Hetihlai hian Dortmund pawh an duai bik lo a, Bundesliga match 25 khelh tawh aṭangin point 58 hmuin hmahruaitu Bayern Munich chu point nga chauhin an phak lo mek. German club lian pahnihte hi kartawp khan an inkhel a, goal a lut lo.
Spurs hian hliam vangin Jan Ver-tong-hen leh Clinton Njie an la chhawr theih dawn loh bakah Dele Alli chu hrem vangin a inlan thei dawn lo a, Thawhlehnia contract thar ziak hlim midfielder Harry Winks tan khelhna hun a inhawng ang.
Dortmund player zingah Sokratis Papastathopoulos chiah khel thei lo tur a awm a, ani hi ṭhâl na vangin a inkhel thei lo mek a ni.
Spurs manager Pochettino chuan, "Arsenal kan khelh ṭum khan kan khel chhe lo a, katianga kan khel chhuak leh thei a nih chuan Dortmund lakah hian hnehna kan chang thei ang. Tun season-a kan inkhelh hmabak la awm zawng zawng hi chu Cup final ang maia pawimawh vek a nih tawh avangin kan theihna zawng zawngin kan bei ang," a ti.
Spurs hian last 32 inkhelah Italian club Fiorentina chu kualmualah 4-1 a an hneh loh hnuin White Hart Lane-ah 3-0 in an lo sawp let thei thung a, team khauh an ni tih a chiang a, Dortmund tan mikhual châkawm tak an ni lo ang.
Dortmund manager Thomas Tuchel chuan, "Team nem zawk hmachhawn duh mah ila hlawhtlinna chang tur chuan hun harsa paltlang a ngai ṭhin a, Spurs hi kan hneh thei a nih chuan a leh pekah chuan inkhel hautak lo zawk a ni tawh hial ang. Vawi hnih inkhel tur ni mah ila a vawi khatna aṭang hian theihtawp kan chhuah nghal a ṭul," tiin an khingpui tur chu last 16 in pet kai zinga team khauh ber pawl nia a hriat thu a sawi.