Dai ngai loh ramah Wolfsburg

Bundesliga club Wolfsburg chuan an club chanchina a vawi khat nan Champions League quar-terfinal an lut.

Thawhlehni zan inkhelah Wolfsburg hian Andre Schurrle goal khat hmangin an mikhual Gent chu 1-0 in an lo hneh a, an inkhelh tawhna hmasa nen belh khawmin 4-2 in hnehna an chang ta a ni.

Belgian champion Gent hian group stage-ah Valencia, Lyon leh Zenit St Petersburg te an hneh thei a, knockout stage-ah erawh beisei ang result an hlawh chhuak thei lo. Gent coach Hein Vanhaezebrouck-a'n inkhelh ṭan hmain quarterfinal lut tur chuan 'thilmak'a ngaih tawh tur thu a sawi a, German-a inkhelah hian Moses Simon cross ṭhatak Danijel Milicevic-a'n goal sira a pet chhuah tih loh chu goal khungna hun ṭha an nei lo tluk a ni.

Wolfsburg hian a zawnin Cham-pions League match li chhung hnehna an chang tawh a, an club chanchina an tawn san lai ber a ni. Hetih mek lai hian chak lo zawk Gent erawhin tun season-a a vawi khat nan UCL-ah goal an khung lo thung.

Goal awm chhun khungtu Schurrle chuan, "Kan khelh ṭhat ber ni a ni lo chiang a, mahse minute 90 chhung Gent kan dan chah theih avangin kan hnathawh kha sawi nep theih a ni lo ang," tiin a sawi.