Anfield-ah Manchester United an lut dawn

Liverpool leh Manchester United hi vawi 166 zet an in-khel tawh mah se European competition-ah erawh an la inhmachhawn ngai lo. Zanin dar 1:35 hian a vawi khat nan Europa League last 16-ah English club inhal tak pahnih hi Anfield-ah an inhmachhawn dawn a, Ten Action-ah pek-chhuah a ni ang.

English club lian Reds leh United te'n Europe inelnaa an la intawng lo hi a mak hial zawk a, an intum dawn takah chuan beisei dan tur pawh hriatthiam a har hle. Manchester United hian Sir Alex Ferguson kaihhruaina hnuaiah England club ropui ber nihna chu Liverpool an chhuhsak tawh a, Reds hian Premier League ṭan hnuah la champion lo mah se Scottish manager ropui meuh pawh khan club mal khai chuan Liverpool hneh aia nuam tih a nei lo.

Manchester United leh Liverpool an intawn tawh chuan inkhel boruak a sang sawt a, player an tlan tam zual a, ṭum dang aiin an tackle a hlauhawm zawk a, an goal khung pawh match dang aiin a pawimawh zawk. Anfield-a goal lut hian quarterfinal lut tur zawk a hril thei dawn a, zanin inkhel hi a hmuhnawm ang.

Louis van Gaal hian Reds lakah result ṭha a nei a, tun season-ah vawi hnih a hneh tawk. Dutch manager hian Old Trafford-ah Brendan Rodgers a enkawl Reds 3-1 a an hneh hnuah kumin kumtir khan Anfield-ah Jurgen Klopp-a hnuaia an phur lai takin 1-0 in an hneh leh bawk. Amaherawhchu United hi an match hnuhnung berah West Brom lakah an mualpho a, inhliamna aṭanga rawn kir Belgian midfielder Marouane Fellaini lah team chhanhim tur khawp chuan a ṭha tawk lo.

Rawlthar duhawm Marcus Rashford-a'n Liverpool an tum theih nan FC Midtjylland lamah goal hnih a khung a, Arsenal lakah goal hnih khung leh ngal mah se English forward hi West Brom lakah a vul lo. A lan dan mai chuan United-in chhandamtu thar an mamawh leh tawh niin lang.

Liverpool hian League Cup final-ah Manchester City hneh lo mah se league-ah 3-0 a sawpin phuba an la nghal a, an match hnuhnung berah Crystal Palace lakah player 10-a comeback-in point thum an hlawh. Squad nei ṭha tawk lo tiin sawisel ṭhin mah se Liverpool hian an match hnuhnung pahnih bikah chuan pressure sang an dawng sawng thiam a, United huhang erawh a la sang hret dawn.

Reds-in kartawpah Daniel Sturridge an awltir a, English striker hi Philippe Coutinho, Adam Lallana leh Roberto Firmino te nen an pawimawh dawn a, chak tur meuh chuan captain Jordan Henderson a chet ṭhat a ṭul tawh dawn.

Jurgen Klopp-a'n United vawi khat chiah a la hmachhawn a, Wayne Rooney goal vangin an chak lo. Zanin hian German manager hian phuba lakna remchang a nei a, Kop zinga tla tlum reng tur chuan Klopp-a tan chak a ngai ang.