East Bengal Vs Aizawl FC Aizawla inkhel tur Mama a phur
March 12-ah Aizawl FC-in East Bengal an mikhual dawn a, RG Stadium-a inkhel turin Kolkata club winger Mizo tlangval S. Mal-sawmtluanga-te'n nimin khan Aizawl an lo thleng.
Mizote hmaa football eizawnna tlak a nihzia pho langtu Mama chuan Aizawl ngeia I League an khel tur chu a phur zia sawiin, "Aizawl FC ka hmachhawn theih dawn leh dawn loh ka sawi thei lo a, hotute thu thu a ni. Mahse, Aizawl khawpui ngeia I League match boruak ka hip tur hrim hrim hi ka phur a, ka tel loh hrim hrim hi ka hlau a ni tawp mai," tiin a phur hle.
Mama chuan, "Hun rei tak chhung he hun lo thleng tur hi ka lo thlir tawh ṭhin a, ka beiseinate chu tunah chuan a tak ramah ngei ka hmu dawn ta," tiin I League-a Mizo club a awm ta chu lawmawm a tih thu a sawi.
East Bengal-a a foot-ball career tam zawk hmangtu Mama chuan Aizawl FC chungchang sawiin, "I League level-ah chuan chak reng theih a ni lo a, a harsa ṭhin. Aizawl FC player-te zingah tawnhriat nei ṭha an la awm lo a, an tan a harsa lehzual. Mahse, tun dinhmunah chuan ka rin aiin Aizawl FC hian an khel ṭha zawk a, a pawimawh ber erawh fan-te ṭawiawmna a ni. Mizo mipuiten duhthusamin Mizo club an la ṭawiawm lo a, banner-te nena au tur an mamawh," tiin Mizote chu an I League club tun aia ṭha zawka ṭawiawm turin a chah.
Kum 31-a upa mid-fielder chuan Aizawl FC chu Mizo club an nih vang ringawta hlahthlem an tum loh thu sawiin, "I League-ah chuan eng pawh thleng thei a ni a, hneh sa an awm thei lo. Mizo ka nih avangin Aizawl FC hian point thum an hmuh ka duhsak a, mahse professional kan nih miau avangin Mizo rilru dah ṭhaa kan khelh a ṭul dawn a ni," tiin a inlan a nih chuan a team tan theihtawp a chhuah tur thu a sawi.
Kolkata club hian match 10-ah point 22 hmuin table-ah pathumnaah an awm mek a, an khelh hmabak chu Aizawl FC, Mohun Bagan, Mumbai FC, Bengaluru FC, Sporting Goa leh Shillong Lajong te an ni.
East Bengal-ah hian Mama bakah Robert Lalthlamuana leh Lalrindika Ralte-te awm mah se, tun season-ah Mizo player-te hi inhliam leh chhan dang vangin an la khel meuh lo.
East Bengal hian champion an tum a, amaherawhchu an match hnuhnung pahnihah Salgaocar leh DSK Shivajians an hneh loh avangin khelh zat inangah an hmelma Mohun Bagan chu point ngain an pha lo.