Bundesliga Final Signal Iduna Park ruakah Bayern Munich

German rama stadium lian ber, mipui 82000 vel an aurual dual dualna ṭhin Signal Iduna Park-ah Bayern Munich chu Borussia Dortmund hmachhawn turin an lenglut dawn - Bundesliga Final ang maia sawi theih inkhel hi Covid-19 vangin a hmunah entu an awm dawn lo. 

Bayern-in match 27 aṭanga point 61 hmuin hma an hruai mek, a zawna season riat nan champion leh an beisei. Dortmund nen an inkarah point li a awm - Bavarians an chak chuan an nomawi kawl lai a himah a ngaih theih, an chak lo a nih erawh chuan an inkarah point khat chauh a awm dawn.

Season hmasa khan Bayern Munich an che fuh tawk lo a, kum chanve hma lamah phei chuan an talbuai hle. January thlaah Dortmund lamin point kua laia hmahruai fal lai pawh an nei, season ruk hnuah nomawi an chhuhsak ngei dawn niin an ngai hman.

Mahse, season chawhnu lamah Bayern an harh thar a, hmalam panin an kal; Dortmund erawh an chesual zauh zauh - April thlatir a nih meuh chuan Lucien Favre ho te hian point hnih chauhin hma an hruai fal tawh, inkhel pawimawh hmachhawn turin Allianz Arena-ah an lenglut zui.

Bayern hian an mikhual hi 5-0 ngawtin an lo sawp a, league hmahruaitu nihna an chhuhsak bakah season tawp thlengin an chungnung zui. League-ah chak loh a pawi a, mahni elpui laka tlawm phei chu a pawi zual - point hloh bakah pek belhna a ni tel.

Kuminah pawh Bayern hian bul an ṭan fuh lo, manager Nicko Kovac ban a ngai hial - Hansi Flick an neih hnuah erawh dan theih lohin an kal sang. Bundesliga bakah Champions League leh German Cup thlengin an result a ṭha.

Sulhnu en chuan Bayern lamin hnehna an chang tura ngaih a ni. Amaherawchu, nikum lam aiin kuminah Favre-a naute hi an puitling tawh zawk. German club lian pahnih hi Super Cup-ah an intawng, Dortmund lamin 2-0 a hnehna an chan bakah November 2018 khan league-ah 3-2 in an chak tawh bawk.

Fans puihna nei thei dawn lo mah se Dortmund lamin inrintawkna an nei sang ve thawkhat tawh, nikum nen chuan a boruak a danglam tawh mai thei. Hripui len hnua match hnih an khelh tawhah an chak ve ve avangin inkhel hmuhnawm an chhawp chhuak ang.

Bundesliga club zinga hlawhtling leh ropui ber chu Bayern Munich an ni a, anmahni elphak ber chu Borussia Dortmund an ni thung. Bavarians ropuizia lan chianna chu an elpui club hian an player duhzawng an nei a nih chuan an chhuhsak hmiah zel!

Dortmund duhlai an chhuhsak zinga langsar mek chu Robert Lewandowski a ni. Poland international hian jersey hak a thlak hnuah pawh goal khung a bansan lo, a hma aiin a uar sauh zawk; a club hlui a hmachhawn vawi 25 aṭangin goal 27 a khung thei a, zaninah pawh a khung a rinawm.

Defender Mats Hummels pawh hi Dortmund tana khel tawh, a vanglai taka Bayern zawmtu, a buaitlak tawh hnua a club hlui bawka kir leh a ni. Dortmund defender hi Inrinni zan khan hliam tenau vangin lakchhuah a ngai a, zanin atan a dinhmun a chiang lo.

Bayern hi hliam vanga buai thei an ni a, midfielder rinrawl zinga mi Thiago Alcantara chuan training-na lamah hliam tenau a tuar a, defender Jerome Boateng chu Eintracht Frankfurt an hneh ṭumin thlak a ngai bawk - zaninah an inlan a nih pawhin duhthusama dam ṭha a ni thei lo ang.

Jadon Sancho thiamzia inhrilh nawn a ngai tawh lo, striker Erling Braut Haaland goal khung theihzia pawh football khawvel titi a tling. Captain Marco Reus erawh malpui hliam vangin a la inlan thei lo ang.

England international Sancho hi hliam dam hlim a ni a, league an khelh chhunzawm leh hnuah match hnih chhung chu bench aṭanga luhtir a ni - Wolfsburg an hneh 

ṭumin assist a nei leh tawh; Bayern lakah hun tam zawk pek a nih a rinawm.

Dortmund tan tun hnaiah Raphael Guerreiro a khel ṭha thei hle bawk. Portuguese midfielder hian an match hnuhnung pahnihah goal thum a khung - inkharkhip hnuah a vul mek. 

Thorgan Hazard, Haaland leh Sancho te hi Bayern tlarhnung su hawng turin an ṭha tawk a, an muala inkhel tur an nih avangin goal an khung pawh a rinawm; point hmu tur erawh chuan an tlarhnung lam an venṭhat ve thung a ngai ang.