Ticket an hralh zo tawh

Manchester United leh Liverpool ten March 17 khian Europa League last 16 second leg an khel dawn a, Old Trafford-ah mipui 75000 zet leng mah se ticket hralh zawh a ni tawh.

United boss Louis van Gaal chuan, "Media lam hian a ṭha lo zawngin kan chanchin hi ziak mah ula, kan club hian ngaihven a hlawh a ni. Old Trafford-a Liverpool kan hmachhawn hun atana ticket 75000 chu hralh zawh a ni tawh a, chu chuan engkim a tihchiang a ni," tiin a sawi.

Dutch manager Van Gaal chuan, "Liverpool hi kan hmelma angin an ziak a, keini chuan khingpui angin kan en a, kan khingpui apiang hneh hi kan duh a ni. United in ka enkawlna hnuaiah Liverpool hi vawi li kan hneh tawh a, vawi ngana leh vawi rukna thlen tir hi ka duh a ni. Chutihrualin Reds hian team angin an khel a, hneh harsa tak an ni," tiin a sawi.

Kum 64-a upa Van Gaal chuan Europa League-a Manchester United leh Liverpool an intawng chu football kalphung pangngai a nih thu a sawi a, eng club mah an chungnung reng theih loh thu a sawi tel bawk.