MSV aia ṭial mawi zawk Tuikual South
'Phengphehlep ṭial mawi te' tiin Tuikual South ṭantuten hnehna an au chhuak a. Mizoram Super League Season 2-a inkhel entu tam ber zanah Tuikual South hian Mission Veng Vikings chu 81-77 in Thawhlehni zan khan an hneh a, match thum khelhah la chak vekin league hmahruaitu an nih bakah semifinal an lut chiang bawk.
Mission Veng Vikings-in an match hnuhnung berah champion tura rinkai Zarkawt BCA an hneh hnuah feet ruk leh inches kua zeta sang Dishant V Shah leh veteran player Lalrinkima te an chhawr theih tawh bawk avangin Tuikual South lakah chak zawk tura rinkai an ni.
Quarter hmasa ber aṭangin Vikings an chungnung nghal a, minute hnih leh a chanve la awm a bigman Dishant a rawn luh chiah phei chuan Mission Veng au thawm aṭang chuan an chak ngei a rinawm. Amaherawhchu Gujarat bigman-in beisei a pha lo a, second quarter-a Dishant an lakchhuah meuh chuan Tuikual South-in hma an hruai tawh.
Vikings-in Kima leh Dishant an neih hi an la ṭangkai pui ngei dawn niin lang mah se match hmasa bera an chak loh chhanah a puh theih. BCA an hneh ṭuma Vikings star Lalrina Renthlei, Moses Zoremmawia leh K. Lalrinchhana te chu player naran an ni a, quarter hnuhnung berah Dishant-a'n point 16 zet nei mah se result a danglam pha tawh lo.
Inpuahchahna nei ṭha Tuikual South player-te fitness a ṭha a, team thawhhona a ṭha bawk. Season liam taa point score hnem ber Mapuia Zote che fuh lo mah se an veng tlangval Lalrohlua chu Gujarat palian lakah a talbuai lo a, an player thar K. Vanlalruata a hunah tak a rah chhuak bawk.
Tuikual South innghahna tak erawh ṭum dang ang thoin bigman Vanchuangpuia a ni a, Armed Veng tlangval hian point 20 bakah game chhungah a ṭangkai hle. Sawi hmaih theih loh chu F. Zodinthara a ni a, team captain Dina hian a theihna zawng zawng an veng club tan a hlan a tih theih, a hun takah point hlu tak a neih
ṭhin bakah a steal neihte chu team tan a pawimawh takzet. Hun tawp hma hretin Dina hian Vikings star Kima lut tur chiang takin a block a, Tuikual South an ding chhuak zui bawk.
Tuikual South coach KC Lallian-tluanga chuan, "Kan fitness a ṭhat avangin rang taka khelh tluan kha kan zuam a ni. Kan khelh dan
ṭha thaw khat viau mah se defen-ding lamah erawh ka la ti ṭha tawk lo a, inchhuang thei kan ni lo," tiin Vanglaini palai a hrilh a, fan pawimawhna a sawi lang tel bawk.
Mission Veng Vikings coach Reuben Lalchhandama chuan, "Kima'n vawi khat chiah training a nei a, Dishant erawh a practice hman lo. Tuna kan mamawh chu kan player neihte thiam taka hman a ni a, an ṭhat theih dan bera khelhtir dan tur kan ngaihtuah ang," tiin a sawi.
Vikings-in semifinal ticket la nei lo mah se player an neih ṭhat bakah ṭantu an neih ṭhat bawk avangin hmalam êng tak an la nei a, knockout stage-ah Mission Veng leh Tuikual South rematch a awm a nih chuan a hmuhnawm khawp ang.