Arsenal-in Hull an sawp

FA Cup champion lai Arsenal chuan an nomawi humhim turin an kalkawngah Hull City chuan lo chelh khawtlai deuh mah se an vawi hnih intawnnaah erawh 4-0 in an sawp.

Arsenal leh Hull te hian February 20 khan Emirates Stadium-ah fifth round hi an lo khel tawh a, goal a luh loh avangin Thawhlehni zan khan KC Stadium-ah replay khelh niin Gunners tan Olivier Giroud leh Theo Walcott te chuan goal hnih ve ve an khung.

Inkhel chu

A zawna match nga chhung ngawt hnehna chang thei tawh lo Arsenal hian goal khung an harsat leh dawnin a lang hman. Minute 41-naah Giroud chuan goal hmahruai a khung a, Gunners-in he inkhela goal zawna an pet hmasak ber a ni nghe nghe.

Thawhṭannia fapa nei thar Giroud hian minute 71-ah an goal hnihna khungin match 11 chhung zet goal a khung loh hnuah goal a hnih a khung ve leh ta. Arsenal-in an la duhtawk mai lo a, England forward Walcott chuan minute 77 leh 88-naah an chak nemngheh nan goal a khung ve leh bawk.

Tlarhnung buaina

Arsenal hian tun hnai ni 18 chhung-in match ruk ngawt an khel a, an defender rinrawl Laurent Koscielny hliam a la damchiang thei lo a, Hull an hmachhawn ṭum hian centre-back Per Mertesacker chu hliam vangin half time hmain thlak a ngai bawk.

Brazilian defender Gabriel Paulista chu second half-ah hliam vang bawkin thlak a ngai a, amah thlaktu Aaron Ramsey pawh khemual chhungah minute 16 chauh hun a hman hnuin dar na vangin thlak a ngai ve leh bawk a ni.

Eng nge an sawi?

Arsenal manager Arsene Wenger chuan, "Kan khel ṭha hle a, mahse kan player pathum laiin hliam an tawrh belh kha a pawi hle. Mertesacker kha na lutuk a ni lo a, Gabriel pawh a dinhmun a
ṭha chhunzawm turah ka ngai. Mahse, Ramsey erawh tlem a chawlh deuh a ngai maithei," tiin a sawi.

Hull boss Steve Bruce chuan, "Kei-mah-ni lam tihsual vangin ho ang reng takin goal hnih kan chhuah a, team
ṭha Arsenal te ang kan hmachhawn a nih chuan khatiang kha a thiang lo. Kan khel ṭha lo zawk tih chu a chiang a, mahse goal li lai chhuah kha chu a awm lo deuh," a ti.

Hmabak

Arsenal hian kartawp Premier League match an khelh chhunzawm thei dawn lo, an khelmualah Watford an lo mikhual tura an ruahman sa chu Pathianni zan dar 7:00-a Watford nen FA Cup quarterfinal an khelh dawn avangin sawn a ni. Kar leh khian Champions League last 16 second leg khel turin Barcelona khelmual Nou Camp an pan leh nghal bawk dawn a ni.

Quarterfinal Fixture

Inrinni zan

11:00 Everton vs Chelsea

Pathianni zan

00:07 Arsenal vs Watford

09:30 Man United vs West Ham