La Liga ṭan nan Real Betis - Sevilla derby

Covid-19 vanga an chawlh hnuah La Liga chu June 11 hian chhunzawm tum a ni a, match hmasa berah Real Betis leh Sevilla te chu entu nei loa inkhel tura beisei an ni.

La Liga chief Javier Tebas chuan, "Inkhel hi Covid-19 vanga thi te pual a ni ang," tiin coronavirus vanga nunna chan te an hriat reng thu a sawi.

Spain hi Covid-19 vanga tuar nasa ram an ni phak a, nimin thleng khan coronavirus natna vei 282,852 awmin mi 28,752 in an thihpui.

Covid-19 vanga ram pum a buai lai hian player langsar Ever Banega, Lucas Ocampos, Franco Vazquez leh Luuk de Jong te chu kartawp khan intih hlimna hmunah an kal a, an thlalak a darh leh tak si avangin an mualpho.

Tebas chuan, "Player-te hi khawtlang entawn tur an ni a, an thil tihah an fimkhur a ṭul. Mi tam tak ei zawnna a nghawng thei tih kan hriat a ṭul a, dan zawm hi kan mawhphurhnaa a ni," tiin a sawi.

Spain prime minister Pedro Sanchez chuan Inrinni khan football inelna sang pahnih chu June 8 aṭangin khelh 

a phalsak.

Kar liam ta aṭang khan La Liga player-te chu hmun khatah 10 aia tam loin training an ṭan tawh. Spain ramah hian March 12 aṭangin inelna tihtawp a ni a, inelna ṭan leh tur chuan training dan pangngaia an training leh phawt a ngai dawn.

Tebas chuan, "Sorkar thuchhuakin min barakhaih a, chutihrualin professional football pawimawhzia a lang. Round pali fixtures siam fel chu kan hna hmasa a ni ang," tiin inelna ṭan tura inbuatsaihna ṭul ang te a sawi.

La Liga-ah hian champion lai Barcelona-in hma an hruai mek a, Real Madrid-in point hnihin an pha lo. Match 11 khelh tur a la awm avangin Zinedine Zidane-a hote tan beisei tur a la awm a, inelna a nung chho khawp ang.