Hliam vanga buai PSG

Neymar ke rek a hliam leh a, tun hnaiah Paris St-Germain chuan player hliam an ngah avangin an buai mek. Brazilian forward erawh an beisei aiin a hliam na lo hlauh niin an sawi thung.

Kar tawp French Ligue 1 inkhelah PSG hi Lyon lakah 1-0 in an tlawm, hun tawp dawnah Neymar chu a ke rek hliam vanga lak chhuah a ni. Thawhṭanni khan a hliam hi endik a ni a, hun rei tak a chawlh loh an beisei.

Thuchhuah siamin PSG chuan, "Neymar dinhmun chu enfiah niin chanchin ṭha lo karah kan beisei aia ṭha lam a ni, a chawlh rih erawh a ngai ang," an ti. Hun rei tak chawl tur nia lang kha Barcelona nen February thlaa Champions League last 16 an khelh hunah chuan a inlan thei ang.

Tun dinhmunah PSG hian Neymar, Juan Bernat, Neymar, Pablo Sarabia, Mauro Icardi leh Julian Draxler te chu hliam vangin an chhawr thei lo mek. Zanina Lorient an mikhual turah pawh defender pawimawh Marquinhos dinhmun a chiang lo bawk.

Thomas Tuchel-a enkawl PSG hi kuminah an kal fal thei tawk lo. Ligue 1 match 14 an khelh aṭangin point 28 an hmu a, table-ah pathumna dinhmun an luah. An chungah hian point 29 hmutu Lyon leh Lille an awm.