India hockey legend Balbir Singh kan chan ta

Hockey khel thiam hmingthang Balbir Singh Sr chu hun rei tak chhung a dam loh hnuah Thawhṭanni zing khan Mohali, Chandigarh-ah a thi a, kum 95 mi a ni. A chenpui a fanu Sushbir Bhomia leh a tupa Kabir te a kalsan.

India tan Olympic hockey-a gold medal vawi thum la thei Balbir Singh hian natna hrang hrang a lo nei tawh ṭhin, a thluak lama harsatna a neih chu hun rei tak enkawl a ni tawh a, chumi hnuah pneumonia a nei leh bawk.

Fortis Hospital director Abhijit Singh chuan, "Zing dar 6:30 vel khan a thi," a ti. Fortis Hospital-ah hian May 8 aṭang khan enkawl a ni a, hetah hian a hun tawp pawh a hmang. 

Balbir Singh hian 1948, 1952 leh 1956 Olympic-ah khan India a champion pui a, 1971 World Cup khan silver medal a vuak chhuahsak bawk. Hockey chauh ni loin infiamna peng dang nena chhut pawhin ram tana a sulhnu hi a ropui.

Helsinki Olympic 1952 khan final-ah Netherlands an hneh a, 6-1 in an chak; he inkhelah hian Balbir Singh-a'n goal nga lai a khung. Melbourne Olympic 1956-ah khan India captain a ni a, gold medal dawng turin goal 38 lai khungin an lamah goal a lut miah lo.

Inkhelh a chawlhsan hnuah pawh team enkawl hna a thawk chhunzawm. 1975 World Cup-ah khan India manager a ni a, a naute chu world champion a nihpui. A hnu lamah India hian ropuina sang hi a la chang leh lo.

Hockey India president Mohd Mushtaque Ahmad chuan, "Kan player ropui leh hmingthang kan chan a ni satliah lo a, kan tan chuan 'Hruaitu Arsi' a her liam a ni. A thihna hian India rama hockey ngainatute chu a nghawng na hle.

"A sulhnu ropui tak tak te chu vawn ṭhat tlat a ni tawh dawn a, ṭhangthar ten a ropuina an la hre zel ang. Hun harsa leh pawimawh laia a thurawn lak tur a awm tawh lo tur erawh a pawi ka ti takzet," tiin a sawi.

Kumin March thaltir khan sap ṭawng chanchinbu darh zau ber Times of India chuan TOISA Award a sem a, chawimawina semna hmunah hian Balbir Singh pawh a inlan; he hunah hian Mizo nula Lalremsiami Hmar chu 'Emerging Player of the Year' atan thlan a ni.

Siami chuan, "Miropui tak tak an thi tawh ṭhin a, hockey chhungkaw tan chuan Balbir Singh thi chu a uiawm takzet. Ani anga player leh manager ropui hi chu an tam lo," tiin Vanglaini a hrilh.