MSL2 inkhel hmuhnawm pahnih awm dawn

Mizoram Super League Season 2 chu vawiin hian Hawla Indoor Stadium, Republic Vengthlangah khelh chhunzawm a ni dawn. Tlai dar 4:00-ah Khatla TBL leh Mission Veng Vikings-te an inkhel ang a, zan dar 8:00-ah Zarkawt Serpents leh Tuikual South-te an inkhel bawk ang.

TBL vs Vikings

MSL1-ah khan TBL hian champion nomawi an chawina tur kawnga league round-ah Vikings hi vawi hnih an hneh. Tun season-ah match hnih an khelh tawhah Chaltlang Ryders leh Zarkawt Serpents an hneh leh tawh avangin inrintawkna an nei sang hle.

Hetihlai hian Vikings hi MSL2-ah champion tum ngam khawpin an insiam ṭha a, an match hmasa pahnih-ah Serpents leh Chaltlang Ryders an hneh. Mahse an match hnuhnung berah Tuikual South an hneh loh avangin an tan insiamṭhatna hun a ni.

TBL hian India team captain Vishesh Bhriguvanshi leh season hmasa lama an hman thiam sa Pratham Singh-te chu team list-ah ziak lut mah se an la chhawr thei lo dawn lo. Mahse TBL tan shooting guard Vanlalmuana chu innghahna tham khawpin a khel ṭha ṭhin a, Dawrpui Vengthar tlangval hian Serpents an hmachhawn ṭumin point 29 score-in three point vawi li ngawt a vawm lut a ni. Hetihlai hian an khingpui tur Vikings erawhin Dishan V Shah an chhawr thei tawh thung a, India U16 captain pawh lo ni tawh hian MSL-a a match hmasa berah a team chakpui zo lo mah se quarter hnuhnung berah point 16 a score thei a ni.

Eng nge an sawi?

TBL manager Lalawmpuia Pachuau chuan, "Kan veng chhung leh hmun dang aṭangin fans kan nei ṭha ṭhina, anni puihna zarah Vikings hi kan hneh theih ka ring. Player inhliam kan nei lo a, kan khingpui tur hi player ṭha tak tak awmna ni mah se ven bik neih kan tum lo, chak ngei tumin kan inbuatsaih," tiin Vanglaini palai a hrilh.

Vikings manager H. Lalhruai-tluanga chuan,"Dishan-a khan a match hmasa berah inbuatsaihna a nei ṭha tawk lo chungin a thiamna a lantir thei tho a, TBL pawh hi a hmachhawn leh ang. Kan fan-te an phurin tlaia inkhel tur mah ni ila kan ṭhahnem leh ka beisei, anni puihna zarah hian MSL1-a vawi hnih kan hneh loh lakah hian hnehna chan ngei kan inbeisei," tiin a sawi.

Serpents vs Tuikual

MSL2-ah team ṭha ber la hre thei lo mah ila tun dinhmuna team hmuhnawm ber chu Tuikual South hi an ni ang? Season hmasaa pathumna Tuikual hian match thum an khelh tawh aṭangin Zarkawt BCA, Chaltlang Ryders leh Mission Veng Vikings lakah hnehna an la chang fai vek a, semifinal an lut chiang tawh.

Serpents erawh vawi thum khelh tawh aṭanga vawi khat chiah chakni hmel la hmu an nih avangin semifinal lut tur chuan chak an mamawh tawh. Coach Arvinder Singh Bawa kaihhruaina hnuaiah an match hnuhnung berah TBL an hneh lo a, Delhi coach hian chak loh nawn a duh lo ang.

Team pahnihte hi MSL-ah khan an lo inhmachhawn tawh a, vawi khat ve ve hnehna an chang. Tuikual South hian captain F. Zodinthara kaihhruaina hnuaiah par an chhuang mek. Serpents innghahna tur chu Sahil Sharma a ni leh dawn a, Guwahati center hian Ryders an hneh ṭumin point 28 a score bakah rebound vawi 18 zet a la thei.

Boss-te thukhawchang

Tuikual South coach KC Lal-lian-tluanga chuan, "Kan squad-ah player 13 chiah kan awm avangin indahṭhat theih a ni rih lo a, kan
ṭhat theih dan berin kan khel zel ang. Veng chhung bakah player-te awmna veng aṭangin ṭawiawmna kan dawng ṭha ṭhin hi a lawmawm takzet a, min ṭawiawm zel tur pawhin ka sawm a ni," a ti.

Serpents manager Dino Laldin-puia Chhangte chuan, "Tuikual South khel ṭha tluang lai hneh ngei turin inbuatsaihna kan nei ngawrh a, semifinal thleng ngei turin kan bei dawn a, playoff chu a ngaihtuah pawh kan ka ngaihtuah duh lo. A tlangpuia thlirin kan player-te an lian zawk a, hei hi chhawr ṭangkai kan tum ang," tiin Vanglani palai a hrilh.