Fan-te chungah Sharapova a lawm

Maria Sharapova-in damdawi hman phal loh meldonium a hmang tih a inpuan hnuah infiamna thuam-hnawh siamtu lian Nike chuan an in-zawmna ti tawp mah se Russian star hian lainattu a nei zel a, a fan-te chuan a lama an ṭan thu leh an khaw-ngaih thu Facebook-ah an tarlang.

Kum 28-a upa Sharapova hi kum li chhung inkhel thei lo tura hrem theih dinhmunah a ding mek a, tennis court-ah a hmel kan hmu tawh kher lo mai thei.

Grand Slam vawi nga champion tawh Sharapova chuan, "Zingah ka tho a, Facebook-ah ka han lut chu ka fan-te'n min tawrhpuina leh ka lama an ṭanna thu hlir mai hi a lo awm ṭeuh mai, anni hian ka phurrit min chhawk a, min ti hlim a ni," a ti.

Sharapova chuan sawi chhun-zawmin, "Internet lam ka khawih mai lo a, mah se ka ṭhiante leh fan-te lam aṭanga thu hriat ka duh vangin ka lut a, ka beisei loh dan deuhin min lo la phatsan lo hian min ti lawm. Tennis chawlhsan ka la duh lo a, ka la inkhelh ve leh ngei ka beisei," tiin a sawi.

Tunhma chuan meldonium hi infiammite tan chuan hman phal loh a ni ngai lo a, kumin January 1 aṭang khan World Anti-Doping Agency's (Wada) chuan hman theih loh zingah an telh a ni.