Zenit hnehtu Benfica an tlang

Nilaini zan Champions League inkehlah Benfica chuan khual-mualah Zenit St Petersburg chu 2-1 a hnehin quarterfinal an inhklangkai.

European champion vawi hnih lo ni tawh Benfica hian anmahni khelmualah Zenit hi 1-0 in an lo hneh tawh a, inkhel pahnih belh-khawmah 3-1 in hnehna an chang.

Petrovsky Stadium-a inkhelah Zenit tan Hulk chuan minute 69-ah tauh lutin last 16 paltlang tur zawk a hriat rih loh. Brazilian striker hian tun season Champions League-ah goal li a khungna chiah niin a
ṭhiante khung tur vawi li a siamsak tawh bawk. Brazil player zingah UCL match 50 khel tling thei 24-na a ni nghe nghe.

Benfica tan midfielder Nicolas Gaitan-a'n an si phurh a sut teuh hle a, keeper Yuri Lodygin chuan lo khawih pialin goal bar a per. Hun tawp hma hretin Benfica lamin thapui an thawh a, minute 85 leh 90+6-ah Gaitan leh Souza Conceicao-te chuan goal an khung a ni.

Boss thukhawchang

Chelsea leh Tottenham pawh lo enkawl tawhtu Andre Villas-Boas hian a vawi khat nan Champions League quarterfinal luh inbeisei mah se a beisei ang a thleng zo lo, season tawp ruala Zenit chhuahsan tur Boas chuan, "Goal khat aia tam khung theihna hun ṭha nei mah ila kan khung miah loh avangin a harsa a ni. Benfica khan hun tawp dawna goal hnih an khung thei kha an thiam vang lam aiin an vanneih vangah a ngaih theih a, chutih rualin kan inthlahdah vang a ni," tiin a sawi.

Benfica coach Rui Vitoria chuan, "Goal khung aia a venhim lam ngaih pawimawh hmasak kan duh a, si khat chhuah mah ila hnehna chang thei tura kan beih letna kha a ropui a, player-ten hnehna chan phu khawpin an khel a ni," tiin a naute a fak hle.