Van der Sar inkhel leh dawn

Manchester United goal-keeper hlui Edwin van der Sar chu khelmual chhungah a inlan leh dawn.

Kum 45-a upa Van der Sar hian kum 2011 khan Man United aṭangin inkhelh a lo chawlh san tawh a, mahse a inzir chhuah-na Dutch amateur team VV Noordwijk goal-keeper a inhliam avangin Inrinnia Jodan Boys hma-chhawn tur team zingah telh a ni dawn.

Noordwijk director Peter Vink chuan, "Ngun taka kan ngaihtuah hnuah Jodan Boys hmachhawn tua Van der Sar inpekna hi a hlu kan ti a, a inkhel ang. Mahse, match khat atan chauh hian a ni ang," a ti.

Van der Sa hian kum 1985-1990 inkar khan VV Noordwijk tan hian a lo khel tawh a, hemi hnu hian Ajax zawmin Amsterdam club tan hian Champions League leh Dutch league title a chawi nghe nghe.

Juventus leh Fulham tan pawha lo khel tawh Van der Sar hian an ram Neththerlands tan match 130 lai a khel a, Manchester United tan pawh 2005-2011 chhung khan khelin Premier League nomawi vawi li bakah Champions League title a chawi pui leh bawk.