I League Relegation Battle Chhiarkawp danin an la tla thei vek
India rama football inelna sang ber I League-ah champion lai Mohun Bagan-in point 22 hmuin hma hruai mek mah se tla thei dinhmuna ding mek Salgaocar FC-in match nga khelh tur an la neih tlat avangin Mariners khumin point 24 an la hmu thei a, Goan club tih theih hi chhiarkawp dan chuan club dang pasarih tan a awl hret bawk. Chhiarkawp danin a huam zau hret tih zep tur a awm lo a, chutihrualin I League relegation battle erawh season tawp thlengin a ngaihnawm ngei a rinawm.
Tute nge him?
DSK Shivajians hi Aizawl FC club ang thoin tun season hi an I League vawi khat khelhna ni mah se a bik taka sawm luh an nih avangin insiamremna hun pek an ni a, season khat chhung chu an relegate thei lo. AIFF-in I League-a Pune khaw club DSK an teltir chhan hi India ram club-te'n professional zawk an zawm theih nan leh inelna nung zawk a awm theih nana tih a ni.
DSK hma hian AIFF chuan Bengaluru FC leh Bharat FC te chu I League second division khel loin I League khelh theihna ticket an lo pe tawh a, India rama football thuneitute ruahmanna hi Bengaluru FC-ah hlawhtling viau mah se Bharat FC erawh kum khat hnuah tih tawp a ni. DSK hi inelna chungchangah chuan season tir lamah bul ṭan ṭha lo a, amaherawhchu player an lakluh belh ve zel avangin relegate thei pawh ni se a hniam berah chuan an awm a rinawm bik lo a, season
ṭantirh lama mipui beiseina erawh an pha lo.
Veteran coach Derrick Pereira enkawl DSK hi dan hmangin an relegate thei lo a, champion inchuh club lian pathum Mohun Bagan, Bengaluru FC leh East Bengal te hi an ṭhat em avangin an relegate ve thei loah a ngaih theih bawk.
Aizawl FC dinhmun
Season ṭan hma hauh aṭangin Aizawl FC hi tawnhriat an la neih tlem vangin relegate tur zinga dah an ni nghal. MPL champion hian Spanish coach Manuel Retamero hnuaia an match hmasa paruk aṭangin point li chauh an hlawh chhuak a, RG Stadium-a Bengaluru FC leh Sporting Goa laka point an hlawh chhuak zo lo chu season tawp-a an dinhmun nghawng pha thei a ni.
Result ṭhat loh avangin Aizawl FC hotuten Spanish coach an ban a, sawiselna pawh an tawng hnem hle. I League-ah team pakua lek an awm avangin Aizawl FC hotute thutlukna hi a sual niin a lang lo a, a chhan chu Retamero hnuaiah an passing game kha chhandamna a ni lo a, a pawimawh ber an point hmuh zat lah himna tham a ni si lo.
Aizawl FC-in head coach atan Jahar Das an la lut a, Bengali coach rual hian I League-a hruai thlengtu coach K. Malsawmkima chu manager-ah an ruat nghal bawk. Coaching staff thar hnuaiah Aizawl FC-in match li khelin point nga an hmu a, Spanish coach hnuaia match ruk an khelh aṭanga an point hmuh zat aiin a tam zawk.
MPL champion khelh chhoh danah Mala a pawimawhna a lang chho bawk a, Spanish coach hnuaia player chhawr bik te an rim viau laiin coaching staff tharten player an siksawi ṭha a, an khelh dan leh player hman danah Mala thluak tih theih tur a tam hle. Spanish coach hnuaia khelhna hmun chang lo H. Lalmuankima, B. Zoramthara, Laldampuia leh William Lalnunfela te khelmualah an inlan a, khelhna hmun chang lo pawh matchday squad-ah an hming hmuh tur a awm bawk.
Aizawl FC-in Nigerian striker Joel Sunday leh Naga striker Khwetelhi Thopi te an la belh bawk nen coaching staff thar hnuaia MPL champion squad hi a chhah ṭha sawt a, I League khel zel turin an ṭha tawk em tih erawh zawhna chhan har tak a ni.
Inrinnia Aizawl FC hmachhawn tur East Bengal hian a zawna vawi thum an chak hnuah Salgaocar leh DSK te an hneh lo a, Kolkata-ah Aizawl FC hi 2-0 a an hneh tawk bawk avangin chak tura rinkai zawk an ni. Chutihrualin coaching staff thar hnuaiah Aizawl FC hian RG Stadium-ah hneh loh an la nei lo a, khualmualah East Bengal hneh theitu Bengaluru FC meuh an chei tawk avangin upset thleng thei a ni.
Aizawl FC hmabak hautakna chu phase 1 lamah RG Stadium-ah an khelh hnem tawh avangin mahni muala khelh tur chu match pathum chiah an nei tawh a, chung zingah chuan East Bengal bakah hmahruaitu Mohun Bagan te an tel a, an elpui ber Salgaocar an tel ve chiah erawh an vanneihah a ngaih theih. I League-ah hian team pakua an awm avangin round tinah team pakhat zel an awl a, Aizawl FC awl hun tur hi round hnuhnung ber a nih avangin fixture ṭha a ni lo, Mizo mipui beiseina chu MPL champion hian midang result-a innghah loin him se tih hi a ni.
Club dang dinhmun
Sporting Goa-in match hnuhnung pathumah Mumbai FC, Mohun Bagan leh Bengaluru FC te an draw thei a, point 14 hmuin table-ah palinaah an awm mek a, tawnhriat an neih ṭhat tawhna nen thlirin him mai tura ngaih an ni.
Mumbai FC hian Goan club ang thoin match hnuhnung pathumah point thum an hmu a, amaherawhchu an team draw-te hi an elpui Sporting Goa, Aizawl FC leh Salgaocar te an nih avangin talbuai thei an ni tlat. Chutihrualin Mumbai FC-in tlak an tum lo a, tun hnaiah player paruk an ziak lut a, an foreigner Min Chol Son leh Matsugane te an dam chhoh theih bawk chuan an inham tang mai a rinawm.
Shillong Lajong-in an match hnuhnung berah Bengaluru an hneh lo mah se hemi hma match li hian point li an hmu a, Kolkata-a Mohun Bagan draw thei an ni. An mualah Goan club Sporting Goa leh Salgaocar an hneh thei a, match zawnin an hnuaia awm Salgaocar (away) leh Aizawl FC (home) an tum dawn a, match hniha an result hian season thara an dinhmun tur a hril thei ang.
DSK Shivajians an tlak thei loh avangin tun dinhmunah hian I League tawp se tla tur chu Salgaocar an ni. Amaherawhchu Goan hian match hnuhnung bera Mumbai FC an draw hmain East Bengal an hneh a, Kolkata club lian an hneh vangin a dinhmun a ṭhat phah hle. Salgaocar hi dah hniam theih an ni lo a, match hmasa pali an chak loh nghal avangin tla thei dinhmuna ding an ni. Coach thar Santosh Kashyap an nei tawh a, season liam taa Royal Wahingdoh pathumna nihpuitu coach hian hmun him lam a pan pui mek a, Aizawl FC elpui ber an nih avangin Mizo club hian an kawng zawh lai hi an tih tawp a ṭul.
Mipui an pawimawh
Aizawl FC-in Mizorama khelh tur match pathum chiah an nei tawh a, a pawimawh vek. East Bengal leh Mohun Bagan ten Mizoram chhung ngeia I League match an khelh hunah entu an tam ngei a rinawm. Mizo club ṭantu aia inkhel entu an tam zawk chuan Aizawl FC-in RG Stadium-a an khelh vangin 'home advantage' an nei lo ang. Mizoramah I League club neih zel duhtu Mizo an tam chuan Mizo club hian an match khelh hmabakah ṭantu an nei ṭha dawn a, Aizawl FC-in an khelh hmabak match thumah 'home advantage' an neih ngei a rinawm bawk.
Aizawl FC Vs East Bengal
@RG Stadium, Mualpui
March 12, Inrinni - 2:30 PM
Ticket lei theihna
1. Olive Pharmacy, MG Rd, Upper Khatla
(Near Baptist Bookroom)
Contact: Rembawiha - 8414010821
2. Lalmuan Pharmacy, Hospital Road
(Near Civil Hospital Main Gate)
Contact: Marinzuala - 9774343650
3. MRF Showroom, Zarkawt (Near Bama Dawr)
Contact: Muanpuia - 9862597206
4. Red Vanda, Chanmari, Baptist Biak In hnuai.
5. LCT Drug Store, Vaivakawn (near Zotlang Peng)
Contact : Mavala - 9856203297
Ticket Man - Rs 50/200/300/400
I League khelh hmabak
Aizawl FC (Pld - 10; 9 Pts)
12 March Vs East Bengal (H)
26 March Vs Mohun Bagan (H)
1 April Vs Shillong Lajong (A)
6 April Vs Sporting Goa (A)
11 April Vs Salgaocar (H)
16 April Vs DSK Shivajians (A)
DSK Shivajians (Pld - 10; 9 Pts)
13 March Vs Sporting Goa (H)
1 April Vs Salgaocar (A)
6 April Vs Bengaluru (H)
9 April Vs Mohun Bagan (A)
16 April Vs Aizawl FC (H)
24 April Vs Mumbai FC (A)
Salgaocar (Pld - 11; 9 Pts)
12 March Vs Shillong Lajong (H)
1 April Vs DSK Shivajians (H)
11 April Vs Aizawl FC (A)
17 April Vs Bengaluru FC (H)
24 April Vs Sporting Goa (H)
Shillong Lajong (Pld - 10; 11 Pts)
12 March Vs Salgaocar (A)
1 April Vs Aizawl FC (H)
5 April Vs Mohun Bagan (H)
10 April Vs Sporting Goa (A)
17 April Vs Mumbai FC (A)
24 April Vs East Bengal (H)
Mumbai FC (Pld - 11; 12 Pts)
13 March Vs Mohun Bagan (A)
2 April Vs Bengaluru (A)
5 April Vs East Bengal (A)
17 April Vs Shillong Lajong (H)
24 April Vs DSK Shivajians (H)
Sporting Goa (Pld - 11; 14 Pts)
13 March Vs DSK Shivajians (A)
6 April Vs Aizawl FC (H)
10 April Vs Shillong Lajong (H)
16 April Vs East Bengal (A)
24 April Vs Salgaocar (A)
East Bengal (Pld - 10; 17 Pts)
12 March Vs Aizawl FC (A)
2 April Vs Mohun Bagan (H)
5 April Vs Mumbai FC (H)
10 April Vs Bengaluru (A)
16 April Vs Sporting Goa (H)
24 April Vs Shillong Lajong (A)
Bengaluru FC (Pld - 11; 22 Pts)
2 April Vs Mumbai FC (H)
6 April Vs DSK Shivajians (A)
10 April Vs East Bengal (H)
17 April Vs Salgaocar (H)
24 April Vs Mohun Bagan (A)
Mohun Bagan (Pld - 10; 22 Pts)
13 March Vs Mumbai FC (H)
26 March Vs Aizawl FC (A)
2 April Vs East Bengal (A)
5 April Vs Shillong Lajong (A)
9 April Vs DSK Shivajians (H)
24 April Vs Bengaluru (H)