Chelsea beiseina titawptu Ibrahimovic

Paris St Germain-in Zlatan Ibrahimovic hmangin Stamford Bridge-ah Chelsea an hneh a, Guus Hiddink-a hote Champions League aṭangin an tla a, Blues-in season tharah Europe inelna sang ber an khelh a rinawm lo bawk.

Parc des Princes-ah PSG 2-1 in an chak a, Nilai zanah Adrien Rabiot-a goal hmangin minute 16-na lekah goal an khung hmasa bawk. Chelsea-in Diego Costa hmangin minute 27-naah goal khatin an chhang let a, amaherawhchu Spanish international striker hi inkhelh ṭan aṭanga darkar khat hnuah lakchhuah a ni. Minute 67-naah vei lam aṭanga Manchester United duh loh Angel di Maria cross chu Ibrahimovic-a'n French club chak nemngheh nan a khung.

Chelsea hi Premier League-ah champion lai ni mah se table-ah 10-na chauh an nih avangin Russian billionaire Roman Abramovich-a'n kum 2003-a London club a lei hnuah a vawi khat nan Champions League an khel dawn lo niin a lang.

A hunah Ibra

PSG-in kum zawnin Cham-pions League aṭangin Chelsea an pet chhuak a, nikuma club pahnih an intawn ṭum khan Swedish striker Zlatan Ibrahimovic chu hnawhchhuah a ni. Hun tawp lamah mikhual PSG an vannei a, player 10-a khel chungin hun tawp dawna David Luiz hmangin an siphurh an sut a, extra time-ah goal chhuah leh mah se minute 114-naa Thiago goal hmangin an sut a, away goal rule hmangin an chak.

Tun ṭumah erawh French champion tan minute 90 chhung Ibra a inlan tawh a, Argentine winger Di Maria a khelh ṭhat bawk avangin PSG hi chak phu zawk an ni a, an chakna zat pawh 4-2 lai a ni. Chutihrualin 1-1 a nih lai hian goal khungtu zawk chu Chelsea ni se chuan kum hmasa lam ang thoin extra time khelh a ṭul thei a, PSG keeper Kevin Trapp a chet ṭhat ve bawk avangin Blues hi a vanduaiah a chhiar ve theih tho bawk.

Manchester United nena sawi zawm striker Zlatan Ibrahimovic chuan, "Minute 20 aia rei field chhungah ka awm a, ka vanneih zan a ni. Chelsea ang team ṭha tum chuan an tlarhma paliten thil danglam an thlen theih reng avangin fimkhur a ngai a, duhthusamin khel lo mah ila chak nan chuan kan khelh dan kha tawk a ni," tiin inkhelh banah a sawi.

Chelea hmabak

Season tharah Chelsea-in coach thar an nei dawn a, Italy boss Antonio Conte an lakluh a rinawm. Champions League an khelh a rinawm loh takah chuan Juventus coach hlui Conte hmabak a huphurhawm a, captain John Terry-a'n club a chhuahsan hmel bawk avangin London club-in Abramovich kaihhruaina hnuaiah a thara bul an ṭan leh a ngai dawn a ni.

Blues hi Inrinniah Everton nen FA Cup quarterfinal-ah an inhmachhawn dawn a, an attacking duo Costa leh Eden Hazard ten inhliam vanga khelmual an chhuahsan avangin an hmabak hi a huphurhawm sawt. A ṭha zawnga thlir chuan Dutch manager Hiddink-a hnuaiah Champions League-ah vawi hnih ngawt chak lo mah se inelna dangah chuan hneh loh an tawng lo.

Eng nge an sawi?

Chelsea manager lailawk Guus Hiddink chuan, "Inkhelh ṭantirh minute 10 chhung kha chu kan zah lutuk a, in-khel pawh an thunun zawk. Amaherawhchu kan theihna anga kan khelh chinah chuan goal chance ngah zawk kan ni. Minute 67-naa goal lut khan inkhel a tidanglam a, khami hmaa goal khungna chance kan hlah leh Diego Costa inhliam kha kan tuar a ni. Kumin hi Chelsea tan chuan season harsa tak a ni a, league lamah pawh palina nih chu a harsa tawh ang," tiin a sawi.

PSG manager Laurent Blanc chuan, "Inkhel harsa tak hmachhawn turin kan inpuahchah a, chu chu kan tih tur pawh a ni. Amaherawhchu kan beisei ang em em harsatna kan nei lo. Angel di Maria kha ṭantirh aṭanga a tawp thlengin Chelsea player tan a hnawksak a, ani lamin a awmna an hre ngai lo a, keini erawh chuan ball pek dan tur kan hre reng. Zlatan-a'n inrintawkna nei turin goal khung a mamawh chuang lo, Chelsea nen chauh ni loin tun season tluanin a la khel ṭha a, goal a khung bakah assist a nei khan a khelh dan a sawifiah chiang hle," tiin an beisei aia Chelsea hneh a awlsam thu a sawi.