A rukin kan inhmukhawm - Walcott

Theo Walcott chuan an manager Arsene Wenger tel loa Arsenal player-te an inhmuhkhawm thu a sawi chhuak.

Gunners hian league-ah a zawnin Manchester United leh Swansea an hneh lo a, player 10 a khel chungin Tottenham 2-2 in an inhnehtawk pui hram bawk. Inelna hrang hrangah a zawna match nga chhung hnehna an chan theih loh hnuah Thawhlehni zan khan FA Cup fifth round replay-ah Hull City chu 4-0 in an sawp.

England international Walcott chuan, "Player kan inhmukhawm a, kan ngaihdan leh kan rilrua awmte kan sawi chhuak. Kan thusawi kha sawi chhuah kher a ṭul lo a mah se rah ṭha a chhuah ni pawhin ka hria," tiin a sawi. Kum 26-a upa Walcott hian tun season-ah Gunners tan match 34 a khelh tawh aṭangin goal riat a khung tawh.

Tun season-ah league match khelh hmabak pakua chiah an nei tawh a, Gunners hi pathumna dinhmunah awmin Spurs chu point thumin an phak lo a hmahruaitu Leicester chu point riatin an phak lo mek bawk.

Arsenal hian kum 12 hnua a vawi khat nan league title lak an inbeisei ve mek a, a zawna a vawi thum nan FA Cup nomawi la turin quarterfinal an inhlangkai tawh bawk.