Jeje-a'n goal a khung zel

Hnahthial tlangval Jeje Lalpekhlua'n goal khung a bansan thei lo. Nilaini zan khan Hong Kong-ah Mohun Bagan-in Lenny Rodrigues (15'), Sony Norde (39'), Cornell Glen (45') leh Jeje (82') te goal hmangin South China chu 4-0 in an sawp a, point ruk hmuin Group G hmahruaitu an ni.

AFC Cup inkhel dangah Benga---luru FC-in an mual Sree Kanteerava Stadium-ah champion lai Johor Darul Ta'zim (JDT) 1-0 in an hneh lo a, Malaysian club tan hian Safiq Rahim-a'n goal awmchhun a khung.

Mohun Bagan-in Hong Kong-a an zin dawn avangin March 5-a Ai-zawl FC nena an inkhelh hun chu March 26-ah sawn a ni. I League champion lai hian AFC Cup-ah result ṭha an duh avangin risk an la a, Hong Kong-ah result ṭha nei mah se RG Stadium, Mualpuiah result ṭha an neih loh chuan champion nomawi hum--him kawngah an talbuai thei bawk.

March 26 hi international match khelh hunlai a nih avangin Bagan-in ram tana khelpha player an chhawr thei lo ang. India coach Stephen Constantine-a'n ram tana khel turin Mariners player pathum Jeje, Pritam Kotal leh Pronoy Halder te a ko a, foreigner zinga an chhuanvawr Sony Norde chu Haiti in World Cup qualifier khel turin an ko bawk. Player ṭha pali leh coach Sanjoy Sen tel loin Mariners-in Aizawl FC an hmachhawn ang.

Mohun Bagan striker Jeje Lalpekhlua chuan, "Tun season hi Mohun Bagan ṭhat ber ṭum a ni hialin ka hria, team tana goal ka khung ve zel avangin ka lawm khawp mai. Inkhel bik kan thlir chuan goal khungna chance ṭha hlah mah ila a tawpah goal ka khung leh tho a, ka lawm khawp mai," tiin Vanglaini palai a hrilh.

Aizawl FC nena an inkhel tur chungchang sawiin, "Aizawl ngeia I League khelh hi ka duhthusam a ni a, India tana ka khelh dawn avangin tun maiah chuan Aizawlah ka la inkhel dawn lo niin lang. Amaherawhchu Pathian zarah kan dam ang a, ka duhthusam hi tih hlawhtlinin a awm ngei ang," tiin Mizoram-a I League khelh a châk thu a sawi.