Newcastle-ah Benitez?

Liverpool boss hlui Rafael Benitez chu Newcastle manager ṭanglai Steve McClaren thlak turin a hming lam rik a ni.

Kum 54-a upa McClaren hian tun season-ah Magpies hi a chetchhiat pui hle a, match 28 an khelh tawh aṭangin point 24 chauh la hlawhchhuah puiin relegate thei dinhmunah an ding mek. An league match hnuhnung vawi rukah vawi nga ngawt an chak lo a ni.

Karleh Thawhanni zan khian New-castle hian league hmahruaitu Leicester City an len chilh dawn a, an result hian an boss dinhmun a hril thui tawh maithei. Derby manager hlui hian a club hi tun season inelna hrang hrangah vawi ruk chiah hnehna a la chanpui thei a ni.

Newcastle board members Charnley, chief scout Graham Carr leh club ambassador Bob Moncur te chu kartir lam khan an inkhelh hmabak match 10-a point an hmuh tam theih dan tur ngaihtuahin an inhmukhawm a, tun thlengin thuthar an la nei lo thung. England manager hlui McLaren hian Nilaini kha chuan team training a la kaihhruai.

Spaniard Benitez hi January khan thla sarih chauh a enkawl hman tihin Real Madrid chuan an ban a, tunah hian club enkawl lai a nei lo.

Kum 55-a upa Benitez hian Premier League-ah tawn hriat a lo nei hnem tawh a, kum 2004-2010 khan Reds enkawlin Champions League leh Europa League nomawi pawh a lo chawi pui tawh nghe nghe.