Old Trafford-ah Man United an zawr

Manchester United leh an ṭhenawm Manchester City kar a zau zel a, chumi finfiah tur chuan October 29, Pathianni zan khan Pep Guardiola hoten Old Trafford an luhchhuah. Erling Haaland chuan goal hnih a khung bakah Phil Foden-a goal khung tur a siamsak a, Man City-in an hmelma Man United 3-0 in an sawp.

Premier League champion lai Man City hian Kevin de Bruyne tel loin season bul an ṭan a, an elpui Arsenal an hneh loh avangin nomawi humhim an harsat dawn niin a lang. Mahse, Pathianni zanah De Bruyne la tel lo mah se Man City-in Haaland hoin champion zia an pholang a, Rodri pawimawhzia a lang leh bawk.

Puitling leh naupang

Manchester United an che fuh thei lo a, amaherawhchu Brentford, Sheffield United leh Copenhagen te a zawna an hneh bakah Old Trafford-a an khelh avangin Erik ten Hag-a hoten beiseina thar an nei. Amaherawhchu Pep Guardiola hoten hun rei lote chhungin an hmelma Man United tan beiseina an titawp a ni ber.

City player-te awmze neiin ball an inpe kual a, an tumah an chiang. Man United erawh an khingpuite ball inpe kual laksak tumin an tlan kual a tih theih. Goalkeeper Andre Onana chet ṭhat zarah Haaland-a'n goal a khung nghal mai bik lo.

Chutihrualin Man United an inrem phui ve tlat avangin City-in goal hmahruai khung turin vanneihna an mamawh. United-in goal khung tura an lakluh Rasmus Hojlund-a'n Rodri lakah penalty a chawi a, VAR hmanga endik hnuah referee-in penalty a pe. Ten Hag-a hote tan referee thutlukna hriatthiam a har ang a, Haaland erawhin goal khung nan a hmang thung.

Hojlund hian a tihsual siamṭhatna hun a nei a, Foden-a pass sual chu la lut mah se box chhungah a inpalbuai avangin keeper Ederson-a tan hna a ni pha lo. Bruno Fernandes-a'n chance a nei a, Scott McTominay-a ball pet ṭha zet chu Ederson-a'n a dang - hemi tluk zet emaw hei ai maha ṭha hian Onana-a'n Haaland-a tauh goal tur a dang!

First half-ah 1-0 a ni a, second half-ah City-in goal an khung hma. Pep-a hoten an zir ang thlap ni awm fahranin ball an inpe kual a, a tawpah Bernardo Silva cross tauh lut turin a hmunah tak Haaland a rawn lang. Norwegian striker hian minute 49-naah goal hnihna a khung a, hattrick siam thei ni mah se keeper Onana-a'n a chance ṭha dang a dansak.

Man United-in kawng engkimah City an ngam lo a ni ber a, vanneih ṭum ni se Marcus Rashford-a'n si phurh sut ṭhenna remchang a nei. Mahse, English striker Rashford hian goal zawnah a khung lo.

City khel a nghet tulh tulh a; John Stones-a'n tlarhnung tichak ringawt loin an goal nawrna kawngah tha a thawh tel. Man United mualphona belhchhah turin Haaland-a'n mahni hma sial miah loin Foden atan a pe a, English midfielder hian minute 80-naah chak nemnghehna goal a khung.

An buai tulh tulh

Sir Alex Ferguson hnuaiah Man United an ropui ṭhin a, Premier League bikah Scottish manager hnuaiah Old Trafford-ah vawi 34 an chak lo. Ferguson chawlh hnuah David Moyes, Louis Van Gaal, Jose Mourinho, Ole Gunnar Solskjaer leh Ten Hag ten United an enkawl a, Premier League-a Old Trafford-a an chak loh zat chu vawi 34 a tling der tawh.

Man United hian manager thar hnuaiah beiseina thar nei ṭhin bawk mah se an beiseina an thamral leh ṭhin. Ten Hag chungah pawh dawhtheihna eng chen nge an neih dawn tih hriatthiam a har. City an hneh loh ṭum hian Hojlund an thlak laiin Ten Hag-a thutlukna duh loin mipuiin an 'boo'. United ṭantute zingah Ten Hag ban duhtu an awm ṭan tawh a, Premier League match 10-a vawi nga an chak loh avangin thilmak erawh a ni hran lo.

Man City ṭantute chu Old Trafford-ah, "London-ah insawn rawh u, he khawpui (Manchester) hi kan ta a ni," tiin an zai rual a, an ropui lai tem phatu United ṭantute tan a na khawp ang. Ten Hag erawhin, "Penalty-in inkhel a thlak danglam," tiin a sawi thung a, an insiamṭhat theih a la ring.

City an vul

Premier League-a Old Trafford-a chak ngun ber chu Man City an ni a, vawi kua an chak tawh. City hian Haaland an kawl a, chutihrualin team anin an ṭha bawk. Manchester derby-ah pawh hian Bernardo Silva a khel ṭha hle. Pep chuan, "Bengbeh a beh lo a, tattoo a nei lo a, car pangngai a khalh. Khelmualah erawh ka player hmuh tawha ṭha ber zinga mi an ni a, mi zawng zawngin an ngaina a ni," tiin Portuguese midfielder hi a fak.

Pep-a'n City chet ṭhat chhan sawi zuiin, "Kei, CEO, Sporting Director leh Chairman te ngaihdan a inang vek. Chuvangin kan club hi a ngelnghet a ni," tiin a sawi. Chutihrualin City hian tun season-ah Arsenal bakah elpui dang an nei a; Tottenham leh Liverpool ten season bul an ṭan ṭhat avangin pathumnaah an awm mek a, tha thlah hman an ni lo.