Boruak duhawm lo karah Liverpool chak

Pathianni zan khan Liverpool-in Premier League match-ah Nottingham Forest an mikhual a, inkhelh hmaa an thu hriat chu inkhel bul ṭan tur zinga telh vek tawh Luis Diaz-a nu leh pa te rukbo an nih thu a ni - he boruak karah hian Liverpool an inlan a, Forest hi 3-0 in an sawp.

Reds tan minute 31-naah Diaz luh loh aia lut Diogo Jota chuan goal hmahruai a khung a, Darwin Nunez-a 'shot' Forest keeper Matt Turner-a dan per chu Jota hian goal-ah a chantir - Diaz-a jersey keng chhuak chungin, hun thim a tawn laiin an ṭhianpa an hre reng tih a pholang.

Minute li a liam a, Anfield-ah Forest an insiamrem hman lo. Khel ṭha êm êm mai Dominik Szoboszlai chuan Nunez tan a siamsak a, Uruguayan striker hian hnai set sawt aṭangin an goal hnihna a khung.

First half-ah Liverpool an chak dawn tih a chiang tawh a, goal khung châka tuihal reng Mohamed Salah-a'n a la duhtawk lo. Minute 77-naah Szoboszlai-a ball thlawh luh chu keeper Turner leh bench aṭanga luhtir Harry Toffolo inringthul karah Salah chuan a chang a, an goal thumna turin a khung - tun season-a goal 10 a khungna niin, assist vawi li a nei bawk.

Salah hi Liverpool player zinga mahni muala league match hmasa pangaa goal khung vek thei pathumna a ni nghal a, Harry Chambers (1922) leh John Aldridge (1987) te hnung a zui - hetiang tithei player-te vanglai inkar hlatzia hi en la, Salah ropuizia i hmu ang.

Forest keeper Turner-a'n goal thum chhuahin, Salah goal a luh theih nan tisual bawk mah se, USA international hi awm lo se Forest hi goal tam zawk chhuah thei an la ni cheu - Ryan Gravenberch leh Szoboszlai te khung tur a dante chu a ṭha takzet.