Medvedev hnehin Sinner a champion

Jannik Sinner chuan player ṭha Daniil Medvedev chu 7-6 (9/7), 4-6, 6-3 a hnehin Vienna Open nomawi a chawi a, tun season kal laiah ATP title pali a lakna a ni nghal bawk.

Kum 22 mi Sinner hi awlsam taka chak a ni bik lo, set khatna tie break an khelh lai hian Medvedev pawhin set point a hmu hman a, mahse a chhawr ṭangkai thei lo.

October thla tir khan Beijing khawpuiah player pahnih hi an lo intawng tawh bawk a, hemi ṭum pawh hian Sinner bawk a chak - tun hnaiah Russian tlangval lakah Italian player a chungnung.

Sinner leh Medvedev te hi ATP Final atan an tling chiang tawh a, a thiam zual pariat inelna hmachhawn turin Turin khawpui an pan dawn, chumi hmain Paris Masters an khel hmasa leh phawt dawn a ni.

Mipa tennis inelna dang Swiss Indoors pawh khelh zawh a ni a, nomawi inchuhna inkhelah Felix Auger-Aliassime chuan Hubert Hurkacz chu 7-6 (7-3), 7-6 (7-5) a hnehin a champion ve bawk.

Auger-Aliassime leh Hurkacz te an inkhel tawk hle a, service an inchhuhsak thei lo. Set khatna tie break tawp lamah Canadian tlangval hian a zawnin point li a hmu a, set hnihna tie break-ah pawh a tawpah point thum hmu zawnin a vannei zawkah a ṭang.

Auger-Aliassime chuan, "Season ka hman ṭhat loh avangin hrehawm ka ti a, taksa hrisel tawk lo vangin harsatna ka tawk lo. Keimah leh keimah hi ka infuih mawlh mawlh zel a, season a tawp dawn meuh chuan a rah ka hmu ta," a ti.