Lyon chuanna bus-in beih a tawk

Ligue 1-ah Pathianni zan khan Lyon leh Marseille chu Stade Velodrome-ah inkhel tur a ni a, mikhual team chuanna bus-in beih a tawk a, Lyon manager Fabio Grosso a inhliam nat avangin inkhelh hun sawn a ngai hial.

Lyon chuanna bus darthlalang hi an vawm keh a, Grosso hian a hmaiah hliam a tuar a, assistant manager Raffaele Longo pawhin hliam a tuar ve bawk. Bus darthlalang hi vawm keh a nih hnuah Grosso hmaiah hian vawm fuh leh a ni.

Lyon club president John Textor chuan, "Grosso hian ṭawng a harsat a, a hmaiah darthlalang them a la awm. Kan player leh coach te inkhel turin an inbuatsaih a, fan-te pawhin inkhel en an duh. Hetiang kara an chunga hetiang a thleng hi ka thinur takzet a ni," tiin a sawi.

Marseille president Pablo Longoria chuan, "Nungchang hre lo mi ṭhenkhat vangin mi 65,000 chuangin inkhel an en theih loh phah. An thil tih hi pawm dam theih a ni lo a, rilruah ka mi zah êm êm Grosso a rawn lang hmasa ber. A dinhmun hre turin amah pawh hmai chhan ngeiah ka hmu a ni," tiin pawi khawihtute a dem thu a sawi.

Kum 45 mi Grosso hi kum 2006 World Cup-a Italy champion puitute zinga mi kha a ni a, kumin September thlaa Laurent Blanc ban a nih khan Lyon hian an player hlui Grosso hi manager atan an la lut a ni.