Jorge Martin tlan chak ber

Pathianni tlaia tlan zawh tak MotoGP Thailand Grand Prix-ah Jorge Martin a tlan chak ber a, a hnungah hian rider championship lama a elpui ber Francesco Bagnaia a thleng thung.

Pramac Racing rider Martin hian point 376 a hmu tling ta a, a chunga awm Bagnaia hian point 389 a hmu thung - rider pahnih inthlauhna hi point 13 chauh a nih tak avangin inelna boruak a ngaihnawm chhunzawm zel dawn - season tawp boruak tihmuhnawmtu an ni zel dawn.

Spanish tlangval Martin hian qualifying a tlan ṭha a, lap khat tlan zo tura hun mamawh tlem record te siam hialin intlansiak takah pawh a hmasa ber aṭangin a tlan ṭan, a elpui Bagnaia leh Brad Binder ten hnaih viau mah se a inveng tluan thei.

Pakhatna Martin leh a hnunga awm pahnih Bagnaia leh Martin te pathum inkarah hian second 0.253 chaih a awm a, bike intlansiakna sang berah hian pakhatna aṭanga pathumna inkar zim ber ṭum an siam hial.

Hnehna changtu Martin chuan, "Tun ṭum intlansiak chu a nuamin a hautak hle mai. A hmuh dan chuan kein aiin bike an nei chak zawk a, an tlan chak takzet. Mahse, vanneih tlak takin a tawpah hnehna ka chang thei hram.

"Team lamin bike ke (tyre) an thlang fuh a, chu chuan nasa takin min pui. Thil harsa deuh tak han tawn hi chu a hahthlak ṭhin a, mahse a tawpah chuan rider ṭha leh chak lehzual zawka min siamtu a ni," tiin a sawi.

Italian rider Bagnaia tan pahnihna nih kha result ṭha a ni, a tirah parukna aṭanga bul ṭanin a che fuh tawk lo a, a tawp lamah erawh insiamṭhain rider hmahruaitu a nihna a la vawnghim zel.

Bike intlansiakna sang ber hi tun season chhungin tlan hmabak pathum chauh an nei tawh. November 12, Pathianni hian Malaysian GP an tlan ang a, chumi hnuah Qatar leh Valencian GP an tlan leh bawk ang.