Silly Point : LUCK-NOW
Lucknow Residency kulh bangte hi i va tlawh chuan, vawiin thleng hian Revolt of 1857-a British East India Company Sipai-ten India Sipai hel te, laipuia an saina hnuhma i la hmu nual ang.
Kum zabi 19-na a British sorkarin India a awpbehna atana hmun pawimawh Lucknow hi, kum zabi 21-na a lo inher meuh chuan British ho World Cup nomawi kawl lai thlauhthlaktirna hmun atan Hindustan team-ten an lo hmang ta thung a ni.
Inkhel pawn
England hi champion lai nomawi humhim tum angin khelmual chhung leh pawn lama an khawsak dan hian a hril hlawl lo a. Ni tin office hna thawk, chhuṭi hun nghakhlel ngawih ngawih an ang ber. Team boruak a ṭha lo nge? kan hre lo le!
Bharat Team erawh kar khat hnuah battery full charge angin an rawn inlan a, champion-na lamtluang an zawhna kawngah hian an ke chheh a la sual meuh lo a ni ber.
Khelmual chhung
October 29, Pathianni chawhnua Bharat Ratna Shri Atal Bihari Vajpayee Ekana Cricket Stadium, Lucknow-ah khan vawm hmasak thlang England captain Jose Buttler khan a tisual thui lem lo.
Indian batsman-ten over hnih an hmachhawn meuh kha chuan, run 200 bawr vel a ṭha tawk tih an hre nghal a, chu aia tam chu bonus a ngaih tur tih an man thiam nghal. Ball a sawt mumal lo a, pitch a muang a, batting a awlsam dawn lo tih kha TV aṭanga over 2-3 thlir hnu khan a hriat nghal vek mai.
English commentator Nasser Hussain-a'n, "Vawiina kan pitch hmuh chu test match a ni thumna pitch ang vel a ni e," a tih khan a khaikhawm chiang ber awm e. Batsman zawng zawng deuhthawin khelh harsa an tih laiin, India kaptan Rohit Sharma erawh a form kal ṭha lai chu hmang ṭangkaiin, 13 runs lekin century a siam lo leh pek.
Suryakumar Yadav-a'n a tawp lama 49 runs rawn contri kha a hlu hle bawk. Hetiang pitch-ah chuan luh hlima va vuak nghal pawp pawh theih a ni lo a, hun engmawchen va din a, mahni lei rem va rah phawta bat a ngai ṭhin a ni.
The Revolt of 2023
Run 230 target kha England tan a awlsam dawn lo a, mah se theih loh leh khirh over a ni hek lo. An batsman lutte khan pitch feet 66 inkara hun an hman tam peih leh peih lohah a innghat a ni ber mai.
Mahse, chutiang chu khawi lamah! Tun World Cup-a, a ṭum lina atan England batting line up chim (collapse) kan hmu leh a. Batsman lut chhuak march pass kan hmu a ni deuh ber mai. Mohammed Shami (22/4) leh Jasprit Bumrah (32/3) te kha, English batsman-te tan chelh zawh rual loh an ni ber mai.
Mit khap kar loah England target um chu a zo a, over 35-naa 125 runs lek tlin a, an thih fai vek khan leng hnawt chhuak ar pawh a la khuang hman lo a ni ber.
Kumpinu ramah ni a tla
World Cup hmasa kum 2019-a an hero pathum Joe Root, Jos Buttler leh Ben Stokes te chu tun ṭum World Cup-ah chuan hlimthla ang chauh an ni a. Tin, England bowler-te hian India Sub Continent pitch atan chuan laimu an nei hraw tawk lo tih chu kan thailanna a rei tawh.
Ekana Khelmual Stadium chhunga mipui 50,000 te khan India ṭanin an au rual ṭhup ṭhup a, an au karah halmawi chi tin reng chung vansang lamah an kap chhuak reng. England player-te sakhmelah erawh tlawmna leh ral thuai se tih inziak hi a lang tlat!
World Cup hmasa a, an champion theih nana hruaitu ropui, tun ṭuma commentator hna thawk Eoin Morgan a ṭawngkam hian kan khar mai ang e. "Form chhia ringawt a ni thei lo, he team-ah hian lang lo lamah hian buaina ril zawk a awm a ni," tiin Morgan-a'n an ram team chungchang a sawi a, an khelh dan thlirin a pawmawm hle.
