Aizawl FC an chak lo Mizo player-te an che ṭha

I League-ah Aizawl FC-in an match hmasa berah Mohammedan SC 2-1 in an hneh lo a, Pathianni inkhel dangah Mizo tlangval Lalromawia leh R. Lalbiakliana te goal hmangin Sreenidi Deccan-in Neroca 4-0 in an sawp.

Naihati Stadium, Kokata-ah Mizo player 13 ngawtin bul an ṭan. Aizawl FC-ah Serbian defender Ivan Maric-a'n bul a ṭan a, a bak zawng Mizo an ni. Mohammedan lamah AFC player hlui pathum Zodingliana Ralte (Adinga), Samuel Lalmuanpuia leh Lalremsanga Fanai ten bul an ṭan. CFL leh Durand Cup-a MSC goal khung khawl David Lalhlansanga chu bench-ah a awm thung.

Dutch manager Erol Akbay hnuaia khel AFC-in passing game khelh an tum a, ṭantu leh player nei ṭha Mohammedan lakah an tum angin an khel thei lo. Mualneituin corner kick an hmang ṭangkai a, minute sarihna lekah Mizo tlangval Samuel-a vawrh luh chu AFC keeper Vanlalhriatpuia'n a man pial. Hriatpuia hian bul ṭan ṭha lo mah se a tawp a khar ṭha a, second half lamah Kolkata club khung tur a dang nasa - substitute David-a goal khung tur a save phei chu ṭha tak a ni.

Mizo club-in minute nga hnuah Hnahthial tlangval K. Lalrinfela hmangin an sut nghal a, goal luh theih nan freekick pettu R. Lalthanmawia leh ball lo khawih hmasa bertu Lalrinzuala te an ṭangkai. Mahse, tlarhnung chetsual vangin Alexis Gomes-a'n Mohammedan tan a khung nawn a, goal dang luh belh tawh loin 2-1 in an tawp.

Season liam ta khan champion thei dinhmuna ding Sreenidi Deccan chu a tawp lamah an chesual a, nomawi an thlauh. Kuminah Sreenidi-in bul an ṭan ṭha a, Neroca 4-0 in an sawp nghal. Season liam taa an striker ṭha David Castaneda Muñoz-a'n goal hnih a khung.

Mizo tlangval Romawia'n minute 57-naah a khung a, goal khung turin Samlukhai tlangval hi a tlan lut ṭha hle. Second half-ah Sreenidi tan Lalnuntluanga Bawihtlung leh Biaktea te an lut. Injury time-ah Aibawk tlangval Biaktea hian halfway line bulah ball per chang fuhin goal lamah a khalh phei a, goalkeeper Soram Anganba-a'n hnaih hman mah se rilru fim takin a club thar tan goal a khung.