A vawi 16 nan Verstappen a chak

Formula 1 champion a nih hnuah pawh Max Verstappen chu a inthlahdah chuang lo a, driver ṭha chungchuang bik a nihzaia a lantir chhunzawm zel - Pathianni zana tlan zawh tak Mexico City Grand Prix-ah a chak ber.

Car intlansiakna sang ber hi Red Bull chuan an thunun hneh hle a, an driver Max-a a champion chian tawh bakah an team chu an champion felna a rei tawh bawk, midang tan hmun an la kian chuang lo.

Kevin Magnussen a chetsual avangin Mexico GP hi tlan ṭhat a ni a, buaina karah pawh ni dang ang thoin Verstappen tho a chungnung a, season khat chhunga chak hnem record a siam chu a tih pun belh zel.

Qualifying lamah Verstappen hi duhthusama ṭhain a tlan bik lo, pathumna aṭangin bul a ṭan - Charles Leclerc leh Carlos Sainz te hnung aṭanga a tlan ṭan a ngai a ni.

Mahse, intlansiak tak an neih hmauh Max hian a inrintawk thu leh hnehna chan a beisei thu a sawi a, a sawi lawk ang ngeiin tlankawngah a takin a lantir, vanglai hmang mek a nih avangin midang tan dan theih an ni lo.

Dutch tlangval Verstappen hnungah hian Lewis Hamilton a thleng. Mercedes driver Hamilton hian season hmasa aṭang khan chak ni hmel a la hmu miah lo - F1 huangah a zawnin chak nei loin season a hmang tluan dawn ta niin a lang.

November 5, Pathianni zanah Brazilian GP an tlan leh ang a, chumi hnuah Las Vegas leh Abu Dhabi GP te an la tlan leh ang.