Giroud goal hnih a tawk zo lo

AC Milan striker Olivier Giroud-a'n goal hnih khung mah se an hum zo lo a, an mikhualna ramah Serie A champion lai Napoli nen 2-2 in an inhnehtawk.

Pathianni zan inkhel dangah Inter Milan chuan Jose Mourinho enkawl AS Roma chu 1-0 in an hneh a, league match vawi 10 an khelh tawh chinah Inter hian point 25 hmuin Italy rama football inelna sang berah hma an hruai.

Premier League lama sulhnu nei tawh Giroud hian Christian Pulisic leh Davide Calabria te cross a tauh lut a, chawlhlawk hmain goal hnih an neih hman avangin an dinhmun pawh a ṭha hman hle.

Mahse, Diego Armando Maradona Stadium-a inkhelah Naples club tan Matteo Politano leh Giacomo Raspadori ten second half-ah si phurh an sut a, hun tawp dawna Bernardo de Souza hnawh chhuah erawhin result a ti danglam lo.

Champion lai Napoli leh Milan ten point an hloh a, tun hnaiah Juventus an rawn insiamṭha thung. Italian champion ni tura inum thawm a na chho dawn; Roma tan erawh beisei san a harsa tawh ang.

Simone Inzaghi enkawl Inter an kaltluang a, an mikhual Roma lakah pawh hun tawp dawna Marcus Thuram goal khung an chak pui thei a, an hmelma leh elpui Milan hi point thumin an kalsan.