ISL-ah goal a sur

Pathianni zan Indian Super League inkhelah Chennaiyin chuan 4-1 ngawtin Punjab FC an sawp a, I League champion Punjab-in tun season ISL-ah chak an la nei lo.

Chennaiyin tan hian Connor Shields chuan goal hnih a khung a; Ryan Edwards, Rafael Crivellaro (penalty) leh Vincy Barretto ten goal khat ṭheuh an khung bawk.

South Indian club hian first half-ah goal thum an khung hman a, penalty chawitu Punjab FC defender Melroy Melwin Assisi chu second half ṭan aṭanga minute thum hnuah hnawhchhuah a ni zui.

Punjab tan a harsa tawh a, hun tawp nan minute li chiah a awm tawh tihah Krishananda Singh chuan goal khung ve mah se an mualpho lutuk tur khuhna chauh a ni - Punjab tan Brandon VL Remdika chuan inkhel bul a ṭan a, striker Daniel Lalhlimpuia chu minute 65-naah lut bawk mah se danglamna a thlen thei bik lo.